सरकारी संचारमाध्यम सुधारया निंतिं अध्ययन समिति

येँ – सरकारी स्वामित्वया संचार माध्यमयात सुधार यायेगु व प्रभावकारी दयेकेगु ल्याखं अध्ययन समिति गठन याःगु दु ।
आमसंचार क्षेत्रय् उल्लेख्य भूमिका म्हिता वयाच्वंगु सरकारी संचारमाध्यम गोरखापत्र संस्थान, रेडियो नेपाल व नेपाल टेलिभिजनयात समग्र सुधार यानाः प्रभावकारी दयेकेगु ल्याखं अध्ययन समिति गठन याःगु खः ।

थुपिं संचारमाध्ययमा नीतिगत, संरचनागत, प्रक्रियागत व प्राविधिगत पक्ष नापं आर्थिक, भौतिक व जनशक्ति व्यवस्थापन लगायतया पक्षया अध्ययन व छानविन यायेत निगू समिति गठन याःगु खः ।

राज्यमन्त्रीस्तरया निर्णयं गठन जूगु समिति अन्तर्गत गोरखापत्र संस्थानय अध्ययन व छानविनया निंतिं विष्णु रिजालया संयोजकत्वय् सुवास देवकोटा, वासुदेव अधिकारी, टिकाराम राई व डोलप्रसाद दाहाल दुजः व मन्त्रालयया उपसचिव संगीता ओझा सदस्य सचिव दुगु समिति गठन याःगु दु ।

अथे हे रेडियो नेपाल व नेपाल टेलिभिजनया समष्टिगत सुधार यायेत गठन याःगु समितिइ रघु मैनाली संयोजक व तपनाथ शुक्ल, यादव चापागाइँ, धरणीधर अधिकार सदस्य दुगु समिति गठन याःगु दु ।गोरखापत्र संस्थानया अध्ययन व छानविन यायेत गठन याःगु समितियात लछि व रेडियो नेपाल व नेपाल टेलिभिजनया अध्ययनया निंतिं गठित समितियात पीन्यान्हुया ई बियातःगु दु ।