गुथिया जग्गा रैकर याःपिंत मुद्दा
येँ (नेपालभाषा टाइम्स) – अख्तियार दुरुपयोग अनुसन्धान आयोगं येँया तोखाय् च्वंगु (साबिक साङ्ला गाविस) निजी गुथिया जग्गा किर्ते जालसाजी यानाः रैकर दयेकाः मिउगु द्वपनय् मालपोत कार्यालयया कर्मचारी व बिचौलिया सहित २७ म्ह विरुद्ध विशेष आदलतय् भ्रष्टाचारया मुद्दा तःगु दु ।
साबिक साङ्ला गाविस-९ (थौंकन्हय् तोखा) स्थित कित्ता नं. १४९, १५४, १५५ व १५७ या निजी गुथिया जग्गा भू-माफिया व कर्मचारी जानाः रैकर (निजी) दयेकाः व्यक्ति विशेषया नामय् दर्ता याःगु अनुसन्धानयया झ्वलय् लुइवं म्हिगः मुद्दा तयागु खँ अख्तियारया प्रवक्ता सुरेश न्यौपानें जारी याःगु विज्ञप्तिइ न्ह्यथनातःगु दु । आयोगया कथं सरकारी अभिलेख (मोठ स्रेस्ता) य् स्पष्ट रुपं ‘निजी गुथि’ धकाः न्ह्यथनातःगु खँग्वःयात कर्मचारीतय्सं हुयाः भिंकातःगु खः । राष्ट्रिय विधि विज्ञान प्रयोगशालाया परीक्षणं स्रेस्ताय् ‘गुथि’ खँग्वः हुयातःगु पुष्टि जूगु खँ धाःगु दु ।
आयोगं मालपोत कार्यालय टोखा सरस्वतीया तत्कालीन कार्यालय प्रमुख सुबोधकुमार खनाल, तत्कालीन नायब सुब्बा रामप्रसाद शर्मा ढकाल, कम्प्युटर अपरेटरपिं जयराम खत्री, नाजोराम भगत व जानुका सापकोटा, तत्कालीन नासु कृष्णप्रसाद पोखरेल व तत्काली खरिदार रुद्रप्रसाद आचार्य विरुद्ध मुद्दा तःगु खः । उकथं हे मालपोत कार्यालय डिल्लीबजारया तत्कालीन खरिदार सूर्यराज पोखरेलयात नं भ्रष्टाचारया मुद्दा तःगु खः ।
LEAVE YOUR COMMENTS