सन् २०१७ य् पास जूपिंत न्हापां कोरिया यंकेत इनाप

येँ – कोरिया वनेगु निंतिं सन् २०१७ य् हे भाषा परीक्षा पास यानातःपिंसं तत्काल कोरिया वनेगु वातावरण दयेकेत सरकारयात इनाप याःगु दु । सन् २०१८ या भाषा परीक्षा पास याःपिं कोरिया थ्यनेधुंकाः तकं थःपिं वनेमखंगु धासें उमिसं थ्व इनाप याःगु खः । सन् २०१७ य् भाषा परीक्षा पास याःपिं तःम्ह हे ल्याय्म्हत कोरिया वनेखंगु मदुनि ।

थथे वनेमखंपिंसं इपिएस पीडित नेपाल समूह गठन यासें दबाबमूलक ज्याझ्वः याना वयाच्वंगु खः । मंगलवाः रत्नपार्कया शान्तिबाटिकाय् छगू ज्याझ्वः यासें पीडित समूहया अध्यक्ष लेखराज कार्कीं २०१७ य् पासा परीक्षा पास याःपिंत प्राथमिकताय् तयाः कोरिया वनेगु प्रक्रिया तत्काल न्ह्याकेत इनाप याःगु खः ।

दछि न्ह्यव हे भाषा परीक्षा पास याःपिंत वास्ता मयासें थुगुसी पास याःपिंत प्राथमिकताय् तयाः कोरिया छ्वयाच्वंगु धासें थुकिं न्हापा भाषा परीक्षा पास याःपिं अन्यायय् लाःगु खँ वय्कलं धयादीगु दु । वय्कलं इपिएस अन्तर्गत भाषा परीक्षा पास याःपिं सकसितं कोरिया यंकेधुंकाः जक मेगु परीक्षा संचालन यायेमाःगु खँ नं धयादीगु दु ।

अथेहे वैदेशिक रोजगार विभाग इपिएस कोरिया शाखां नं २०१७ य् भाषा परीक्षा पास याःपिंत निं प्राथमिकता बीत कोरियाया मानव संशाधन विभागयात इनाप याःगु दु । विभागया प्रतिनिधिपिं लिसें मंगलवाः हे सहलह यासें २०१७ य् पास जूपिंत इलय् हे कोरिया यंकेत इनाप यानागु खँ इपिएस कोरिया शाखाया निर्देशक कृष्णप्रसाद खनालं धयादीगु दु ।

भाषा परीक्षा पास यानाः रोस्टरय् लानाच्वंपिं ज्यामित निदँ दुने कोरिया वने हे माःगु प्रावधान दु । २०१७ या भाषा परीक्षा पास याःपिं मध्ये थ्यंमथ्यं न्याद्वःम्ह ज्यामित कोरिया वने मखनाच्वंगु खँ इपिएस नेपाल पीडित समुहं धाःगु दु । वंगु असोज मसान्त तकया दुने ७५ हजार ६७९ म्ह ज्यामित रोजगारया निंतिं कोरिया वनेधुंकूगु खँ इपिएस कोरिया शाखां धाःगु दु ।