व्यापारीतय्त गुणस्तरीय सामग्री जक विक्री यायेत निर्देशन

ख्वप (नेपालभाषा टाइम्स) – ख्वप नगरपालिकां नगर क्षेत्र दुने गुणस्तरीय सामानया जक विक्री वितरण यायेत व्यपारीतय्त निर्दे शन बिउगु दु। ख्वप नगरपालिकां थःगु हे ज्याकुथिइ नगर दुनेया पसः व व्यवसाय संचालन याना वयाच्वंपिं व्यापारीतय् छगू भेला यासें उकथं निर्दे शन बिउगु खः । नगरपालिकाया प्रमुख सुनिल प्रजापतिं भेलाय् नवासें मनूया जिउ ज्यान हे खतराय् लाइगु अखाद्य वस्तुया विक्री वितरण मयायेत इनाप यासें गुणस्तरीय सामान जक विक्री यायेत निर्देशन बियादीगु खः । लिसें वय्कलं म्याद फुइ धुंकूगु सामग्री बिस्कं तयाः नष्ट यायेत व पसलय् खने दयेक मूल्यसुची तयेत नं निर्देशन बियादीगु दु ।

व्यापार धइगु सेवा भावं यायेगु व्यवसाय जूगुलिं सामान विक्री यायेबलय् भाः उल्लेख यानाः गुणस्तरीय सामान मियाः उपभोक्ताया नुगः त्याके कथं व्यवसाय संचालन यायेमाःगु खँय् बः बियादिसें नगरप्रमुख प्रजापतिं बजाः अनुगमनय् व्यवसायीतय्सं आपालं लापरवाही यानाच्वंगु धासें सचेत यानादिल । वय्कलं इलय् हे पसः दर्ता यानाः व्यवसाय यायेत नापं नगरपालिकायात पुलेमाःगु कर नं इलय् हे पुलेगु व व्यावार व्यवसाय यायेगु थाय् न्ह्याबलें नं सुचुकुचु यानाः व्यवसाय संचालन यायेत नं इनाप यानादिल ।

भेलाय् ख्वप नगरपालिका वडा नं ३या वडाअध्यक्ष नापं बजाः अनुमगन समितिया संयोजक राजकृष्ण गोरा, वडा नं. ६या वडाअध्यक्षलिसें समितिया दुजः हरिराम सुवाल, वडा नं. ७ या वडाअध्यक्ष उकेश कवां, समितिया दुजःपिं रोनशमैयाँ सुवाल, वडा निरीक्षक रामकृष्ण प्रजापति लगायतं बजाः व्यवस्थित याये फत धाःसा जक नगरवासीया स्वास्थ्य नं बांलाइ धयादिल ।

उगु इलय् भेलाय् उपस्थित व्वयवसायीतय्सं थःपिनिगु समस्या तयेगु नापं नगरपालिका बीमाःगु सेवा सुविध बारे नुगःखँ तयादीगु खः ।