लकडाउनय् खुगू अर्बया वासः आयात

येँ (रासस) – वंगु चैत ११ निसें सुरु जूगु लकडाउन दुने खुगू अर्बया वासः आयात जूगु दु। उद्योग वाणिज्य तथा आपूर्ति मन्त्रालयं नकतिनि सार्वजनिक याःगु तथ्यांक कथं थ्व अवधिइ न्यागू अर्ब ९० करोड ९६ लाख १० हजार तका बराबरया तयारी वासः व कच्चा पदार्थ आयात जूगु खः । थ्व अवधि दुने प्यंगू अर्ब ५७ करोड, २९ लाख ९३ हजार तका बराबरया तयारी वासः व छगू अर्ब ३३ करोड ६६ ल ाख १७ हजार तका बराबरया वासः कच्चा पदार्थ आयात जूगु खः ।

मन्त्रालयया प्रवक्ता प्रकाश दाहालया कथं बन्दाबन्दीया अवधी दुने स्वंगू लाख १२ हजार ८८१ मेट्रिक टन खाद्यान्न, ७८ हजार २२७ मेट्रिक टन केँ, ९९ हजार ३७३ मेट्रिक टन तरकारी, ३९ हजार ४४८ मेट्रिक टन फलफुल व १२ हजार ३११ मेट्रिक टन दुग्यजन्य पदार्थया आयात जूगु खः ।

वय्कःया कथं बन्दाबन्दी सुर जुइधुंकाः खाद्य पदार्थया आयातय् नं बृद्धि जूगु दु। न्हापांगु वालं निसें झिगूगू वाः तकया औसत आयातया तुलनाय्खा द्यान्नय् ६.९ प्रतिशत व दाल, बुबःया आयात १७ प्रतिशत अप्वः खनेदुगु खः । अथेहे तरकारी ४ प्रतिशत, फलफुल आयात ३८ प्रतिशत, दुग्धजन्य पदार्थया आयात २६५८ प्रतिशत, वासःया कच्चा पदार्थ ३० प्रतिशत व तयारी वासः ४४.२ प्रतिशतं अप्वःगु खः ।

रसुवागढी नाका बाहेक फुक्क सीमानापाखें निरन्तर रुपं सामान आयात जुयाच्वंगु मन्त्रालयं धाःगु दु। वंगु जेठ १ गते निसें ३१ गते तक खाद्यान्न, वासः लगायतया पदार्थ ज्वनाः स्वनिगलय् ३ हजार ८९० गः ट्रक दुहां वःगु खः । थ्व मध्ये वा तयाहःगु ७०, कःनि तयाहःगु ३९२ गः, जाकि तयाहःगु ६६४ गः, छ्व तयाहःगु १४७ गः, मैदा तयाहःगु १५१ गः, चिनी तयाहःगु १०१ गः, चि तयाहःगु ३१ गः, दाल तयाहःगु १०५ गः, ख्येँ तयाहःगु १३५ गः, खा तयाहःगु १६७ गः, सिसाबुसा तयाहःगु ४२० गः, दुरु तयाहःगु २७६ गः, वासः तयाहःगु २०९ गः, घ्यः चिकं तयाहःगु १९२ गः, अक्सिजन तयाहःगु ९ गः, तरकारी तयाहःगु ८२१ गः ट्रक स्वनिगलय् दुहां वःगु खः ।