सरकारी नीतिया कारणं कापः उद्योग धराशायी जुइगु अवस्थाय्

येँ – नेपाःया निसः स्वयां अप्वः कापः उद्योग बन्द जुइगु अवस्थाय् थ्यंगु खँ नेपाल कपडा उद्योड संघं धाःगु दु । संघं म्हिगः थन छगू पत्रकार सम्मेलन यासें उगु खँ धाःगु ख ः।

पत्रकार सम्मेलनया न्ववायेगु झ्वलय् संघया अध्यक्ष शैलेन्द्रलाल प्रधानं न्हापा हे निसः स्वयां अप्वः उद्योग बन्द जुइधुंकूगु व आः नं सरकारी नीतिया कारणं उद्योग बन्द जुइगु अवस्था वःगु खँ धाःगु दु । सरकारं न्हापा कापः उद्योगयात बिया वयाच्वंगु सुविधा थुगु आर्थिक दँया बजेटय् चीकूगु व अवैधानिक रुपं आयात अप्वःगु, आयात जुयाच्वंगु कापः लिसें प्रतिस्पर्धा याये मफइगु अवस्था वःगुलिं यानाः उद्योग बन्द जुइगु अवस्थाय् थ्यंगु खँ धाःगु दु ।

न्हापां सरकारं सिन्थेटिक कापलय् मूल्य अभिवृद्धि कर १३ प्रतिशत कायेगु याना वयाच्वंगु खःसा उकिया ७० प्रतिशत उद्योगयात हे लित बीगु यानाच्वंगु खः । अथेहे सुतिया कापः न्यायेबलय् पूगु ध्यबां मीगु इलय् उठे याःगु कर समायोजन यायेगु याना वयाच्वंगु खःसा आः उगु सुविधा फुक्कं खारेज यायेवं नेपाः उद्योग धरायसी जुइगु अवस्थाय् थ्यंगु खँ नं पत्रकार सम्मेलनय् जानकारी याकूगु खः ।

संघया कथं देय्न्यंकं वैधानिक रुपं १० प्रतिशत व अवैधानिक रुपं ९० प्रतिशत कापः आयात जुयाच्वंगु दु । अवैधानिक रुपं आयात जुयाच्वंगु कापःया हुनिं सरकारं २० अर्ब स्वयां अप्वः राजश्व गुमे यायेमालाच्वंगु खँ नं अध्यक्ष प्रधानं कनादिल । अवैधानिक रुपं जुयाच्वंगु आयातयात छुं भचा जक सुधार यायेफुसां १० अर्ब तका राजश्व उठे यायेफइगु खँ नं वय्कलं कनादिल ।

थौकन्हय् नेपालय् प्रतिव्यक्तियात ६५ मिटर कापः मालिगु व उकिया आधारय् नेपालय् थ्यंमथ्यं दँय् १ अर्ब ८० करोड मिटर कापः माःगु जानकारी नं वय्कलं बियादिसें धयादी, ‘आः नेपालय् ७ करोड मिटर कापः जक उत्पादन जुयाच्वंगु दु । थ्व बाहेक मेगु वैधानिक रुपं १० प्रतिशत व ९० प्रतिशत अवैधानिक रुपं आयात जुयाच्वंगु दु ।’

ज्याझ्वलय् संघया उपाध्यक्ष जितेन्द्र लोहियां वंगु इलय् तराई क्षेत्रया औद्योगिक करिडोरय् सञ्चालन जुयाच्वंगु २०-२५ उद्योग मध्ये आः छगू जक चले जुयाच्वंगु खँ कनादिल । २०७१ साल लिपा कापः उद्योगीया निंतिं छु सहज कानुन वःसां नं लिपांगु २०७५-७६ या अध्यादेशपाखें सरकारं उद्योगयात धरासयी लँपुइ छ्वःगु द्वपं नं वय्कलं बियादिल ।