स्थानीय तहं प्रदेशयात राजश्व मइऊँ
येँ – चालु आर्थिक दँ थ्यंमथ्यं क्वचाये हे त्यंगु ई थ्यनेधुंकाः नं प्रदेश नं. ३ या सछिगुलिं मल्याक स्थानीय तहं खुसिं लिकाइगु थीथी पदार्थया राजश्व बाँडफाँट मयाःनि । राजश्व बाँडफाँट मयाःगुलिं प्रदेश सभा अन्तर्गतया लेखा समितिं उपसमिति दयेकाः स्थानीय तहय् अनुगमन याकेत छ्वःगु दु ।
उपसमितिं प्रदेश अन्तर्गत लाःगु झिंस्वंगुलिं जिल्लाया स्थानीय तहया अनुगमन यानाः प्रदेश सञ्चित खाताय् राजश्व जम्मा याकेगु निंतिं मंगलवाः निसें हे अनुगमन न्ह्याकूगु दु । उपसमितिया संयोजक रत्न ढकालं स्थानीय तहं फि, गिट्टी, ल्वहंया बोलपत्रपाखें मिउगु आम्दानीया ४० प्रतिशत प्रदेश सञ्चित खाताय् जम्मा मजुइवं स्थलगत अनुगमनय् वनागु खँ धयादीगु दु ।
उपसमितिं काभ्रेपलाञ्चोक जिल्लां निसें अनुगमन सुरु याःगु खः ।ढकालया संयोजकत्वय् गठन याःगु उपसमितिइ प्रदेश सभा सदस्य दीपक निरौला, सन्त प्रजा, रीता माझी व रमेश पौडेल दुथ्याःगु दु । प्रदेश आर्थिक ऐनय् खुसिपाखें वइगु पदार्थ, मनोरञ्जन कर व विज्ञापन कर स्थानीय तह थःम्हेसिनं म्हयाः लय् लय्पतिकं बाँडफाँट यानाः प्रदेश सञ्चित कोषय् जम्मा यानाः विवरण छ्वयेमाः ।
तर स्थानीय तहं धाःसा आःतक थुकिया पालना मयाःगुलिं प्रदेश सरकारया राजश्व लक्ष्य पूमवंगु खँ धाःगु दु ।प्रदेश सरकारं रोयल्टीसहित चालू आर्थिक दँय् ११९ गू स्थानीय तहपाखें ९ अर्ब ३३ करोड राजश्व संकलन यायेगु लक्ष्य तयातःगु खः ।
संयोजक निरौलाया कथं स्थानीय तहं गाक्क राजश्व संकलन याःसां प्रदेश सरकारया सञ्जित कोषय् दाखिला मयाःगु व स्थानीय तहं खुसि उत्खननया नामय् व्यापाक रुपं दोहन यानाच्वंगु व अनियमितता यानाच्वंगु गुनासो वयाच्वंगुलिं अनुगमन सुरु जूगु खँ धयादीगु दु ।
‘स्थानीय तहं प्रदेश सरकारया परिपत्र तकं बेवास्ता यासेलिं अनुगमन ला याये हे माल’ वय्कलं धयादीगु दु ।
चालु आर्थिक दँया ११ महिना दुने झिगू जिल्लाया झिगू स्थानीय तहं जक प्रदेश सञ्चित कोषय् राजश्व दाखिला याःगु उपसमितिया संयोजक ढकालं धयादीगु दु । उपिं स्थानीय तहपाखें मुक्कं १२ करोड ४३ लाख, ५१ हजार ७१२ तका राजश्व दाखिला जूगु दु । राजश्व दाखिला यायेगु निंतिं वंगु साउन २२ गते हे प्रदेश सरकारं फुक्क स्थानीय तहयात जिल्ला समन्वय समितिपाखें परिपत्र याःगु खः ।
काभ्रेपलाञ्चोकया समन्वय अधिकारी सच्युतराज उप्रेतीं जिल्लाया फुक्कं स्थानीय तहय् प्रदेशया पौ थ्यंकागु धयादीगु दु । तर काभ्रपलाञ्चोकया पनौति नगरपालिकाया प्रमुख भीम न्यौपानें धाःसा थःपिं आतक अज्याःगु पौ मवःनिगु खँ धयादीगु दु ।
वय्कलं धयादीगु दु, ‘जिमित आःतक पौ वःगु मदुनि । गुकथं जम्मा यायेगु धयागु बारे नं मसिउ ।’वय्कलं स्थानीय तहया खुसिं लिकाःगु पदार्थपाखें संकलित राजश्व प्रदेश सरकारयात बुझे यायेमाः धयागु तकं थःम्हं मसिउगु खँ धयादीगु दु ।
LEAVE YOUR COMMENTS