न्हय्गुलिं प्रदेशय् बजेट न्ह्यब्वल
येँ – संविधान कथं असार १ गते प्रदेशया बजेट न्ह्यब्वयेमाःगु प्रावधान कथं म्हिगः न्हय्गुलिं प्रदेशं वइगु आर्थिक दँ २०७६÷७७या निंतिं बजेट न्ह्यब्वःगु दु ।
प्रदेश १ ः ४२ अर्ब ४ लाख तका
थुकी प्रदेश १य् आर्थिक दँ २०७६÷७७या निंतिं ४२ अर्ब २० करोड तकाया बजेट पितबिउगु दु । प्रदेशया आर्थिक मामिलामन्त्री इन्द्र आड्बों आइतवाः प्रदेश सभा बैठकय् ४२ अर्ब ४ लाख १२ हजार तकाया बजेट न्ह्यब्वयादीगु खः । प्रदेश १ या बजेटय् चालु खर्च पाखे १८ अर्ब २० करोड ४ लाख १२ हजार तका दुसा पुँजीगत खर्च पाखे २३ अर्ब ५७ करोड ३९ लाख ३४ हजार तका दु ।
बजेटया स्रोतय् आन्तरिक राजश्वपाखें ३ अर्ब ८६ करोड म्हयेगु लक्ष्य तयातःगु दु । थुकी राजश्व बाँडफाँटपाखें १० अर्ब ५२ करोड, अनुदानपाखें २१ अर्ब २१ करोड वइ । अथेहे चालु आर्थिक दँय् ६ अर्ब ६१ करोड खर्च यायेमफुगु ध्यबा ल्यं दइगु खँ धाःगु दु ।
प्रदेश २ ः पूँजीगत व चालु बछि बछि
प्रदेश २ सरकारं वइगु आर्थिक दँया निंतिं ३८ अर्ब ७२ करोड तकाया बजेट हःगु दु । आर्थिक मामिलामन्त्री विजयकुमार यादवं आइतवाः प्रदेश सभाय् न्ह्यब्वःगु बजेटय् ३८ अर्ब ७२ करोड ५६ लाख ६१ हजार तका विनियोजन यानातःगु दु । थुकी चालुपाखे १९ अर्ब ११ करोड, ९७ लाख ३८ हजार दुसा पूँजीगतपाखे १९ अर्ब २६ करोड ५४ ल ाख ६४ हजार तका दु ।
थुकी चालुपाखे ४९.८१ प्रतिशत दुसा पूँजीगतपाखे ५०.१९ प्रतिशत दु ।बजेटया स्रोत आन्तरिक राजश्वपाखें १३ अर्ब ५४ करोड, ३१ लाख ६९ हजार म्हयेगु लक्ष्य तयातःगु दुसा संघीय अनुदानपाखें १६ अर्ब १७ करोड ७४ लाख, चालु आवया नगद मौज्दातपाखें ७ अर्ब ७० करोड ७२ लाख ९२ हजार वइगु खँ धाःगु दु । आन्तरिक त्यासापाखें १ अर्ब ३० करोड वइगु खँ धयातःगु दु ।
प्रदेश ३ ः पूँजीगत स्वयां चालु खर्च अप्वः
प्रदेश नं. ३ आर्थिक मामिला व योजनामन्त्री आर्थिक दँ २०७६÷७या निंतिं कैलाश ढुंगाना ४७ अर्ब ६० करोड ७८ लाख ८६ हजार तकाया बजेट न्ह्यब्वयादीगु दु । बजेट कथं थुकी २४ अर्ब ४६ करोड ७९ लाख ९० हजार तका चालु पाखे खर्च जुइसा पूँजीपाखे २२ अर्ब ८३ करोड ९८ लाख ९६ हजार तका खर्च जुइ ।
वित्तीय व्यवस्थापाखे ३० करोड खर्च जुइगु अनुमान यानातःगु दु । मन्त्री ढुंगेल न्ह्यब्वःगु बजेटय् पुँजीगत खर्च स्वयां चालु खर्च अप्वः दु । प्रदेश नं ३ य् वइगु आर्थिक दँय् पूँजीगत खर्च मुक्कं ४७.९८ प्रतिशत जुइसा चालु खर्च ५१.३९ प्रतिशत जुइ ।
बजेटया स्रोतय् राजश्वपाखें १५ अर्ब ४९ करोड ४९ लाख म्हयेगु लक्ष्य तयातःगु दु । मेगु ध्यबा अन्तर सरकारी अनुदानपाखें १८ अर्ब ६ करोड १३ लाख, मेमेगु राजश्वपाखें ७ अर्ब ३० करोड, राजश्व बचतपाखें ६ अर्ब ७५ करोड १६ लाख ८६ हजार तका वइगु अनुमान यानातःगु दु ।
गण्डकी प्रदेश ः ३२ अर्ब १३ करोड
गण्डकी प्रदेशं आर्थिक दँ २०७६÷७७ या निंतिं ३२ अर्ब १३ करोडया बजेट विनियोजन याःगु दु । म्हिगः प्रदेशया आर्थिक मामिला मन्त्री किरण गुरुंगं ३२ अर्ब १३ करोड ४७ लाखया बजेट प्रदेश सभाय् न्ह्यब्वयादीगु खः । थ्व बजेट चालु खर्चपाखें १२ अर्ब २८ करोड ९० लाख दुसा पूँजीगत खर्चय् १९ अर्ब ८४ करोड ९० लाख दु ।
प्रदेश ५ ः सांसदतय्त ६०–६० लाख
अथेहे प्रदेश नं. ५य् आर्थिक दँ २०७६÷७७ या निंतिं ३६ अर्ब ४१ करोडया बजेट विनियोजन याःगु दु । आर्थिक मामिला व योजना मन्त्रालयया जिम्मेवारी नं कयातःम्ह मुख्य मन्त्री शंकर पोखरेलं म्हिगः बजेट न्ह्यब्वयादीगु खः । प्रदेश ५ य् चालु आर्थिक दँय् ज्या सुरु यानाः पूमवंनिगु योजनाया निंतिं नं ध्यबा छुटे याःगु दु ।
प्रदेश ५ या सरकारं साढे ३ अर्ब दां राजश्व पाखें म्हयेगु लक्ष्य तयातःगु दुसा वित्तीय समानुकरण पाखें ७ अर्ब ५४ करोड १ लाख तका, राजश्व बाँडफाँटपाखें ९अर्ब ९१ करोड २३ लाख व सशर्त अनुदानपाखें ७ अर्ब ७७ करोड ४ लाख तका दां वइगु खँ धाःगु दु ।प्रदेश ५ या सांसदतय्सं ६०–६० लाख खर्च याये दइगु जूगु दु ।
सरकारं सांसदतय्सं माग याःगु शिक्षा, स्वास्थ्य लगायतया खुगू योजनाय् खर्च याये दइकथं हरेक सांसदतय् निंतिं ६०–६० लाख तका छुटे याःगु खः । थगुने प्रदेश ५ य् सडक योजनाया निंतिं सांसदतय्त ५० लाख बिउगु खः ।
कर्णाली प्रदेश ः ३४ अर्ब ३५ करोडया बजेट
कणाली प्रदेशया वइगु आर्थिक दँया बजेट ३४ अर्ब ३५ करोड विनियोजन याःगु दु । म्हिगः आर्थिक मामिलामन्त्री प्रकाश ज्वालां प्रदेश सभाय् ३४ अर्ब ३५ करोड ३४ लाख २५ हजार तकाया बजेट न्ह्यब्वयादीगु खः । थुकी चालु खर्चपाखे १३ अर्ब ५ करोड ९६ लाख ५३ हजार व पूँजीगत पाखे २१ अर्ब २९ करोड ३७ लाख ७२ हजार विनियोजन यानातःगु दु ।
कर्णाली प्रदेशं बजेटया स्रोत कथं आन्तरिक राजश्व पाखें २५ करोड १० लाख ४१ म्हयेगु लक्ष्य दुसा चालु आर्थिक दँय् खर्च मजूगु ८ अर्ब ९४ करोड ७४ लाख ८४ हजार तका दु ।
अथेहे संघीय सरकारपाखें राजश्व बाँडफाँट पाखें ७ अर्ब ४४ करोड ४३ लाख, प्राकृतिक स्रोत व रोयल्टी बाँडफाँटपाखें वइगु २ करोड ७४ लाख व सशस्र्त अनुदान पाखें वइगु ५ अर्ब २७ करोड २७ लाख व विशेष अनुदानपाखें १ अर्ब ८१ करोड तका वइ । थुकी मगाःगु ७५ करोड तका दां आन्तरिक त्यासा पाखें हयेगु खँ न्ह्यथनातःगु दु ।
LEAVE YOUR COMMENTS