ह्वाइट हाउसय् ल्वापु ,मिसाम्ह सुरक्षा सल्हाकारयात लिकायेत मेलानिया ट्रम्पया माग

अमेरिकी राष्ट्रपति डोनाल्ड ट्रम्पया कलाः मेलानिया ट्रम्पं छम्ह शीर्ष राष्ट्रिय सुरक्षा अधिकारयात वयागु ज्यां लिकयाछ्वयेत माग याःगु दु । अमेरिकी मिडियाय् वःगु रिपोर्ट कथं वंगु अक्टोवरय् अफ्रिका भ्रमणय् वंगु इलय् प्रथम महिला मलेनिया ट्रम्प व डेपुटी राष्ट्रिय सुरक्षा सल्हाकार मीरा रिकार्डेल दथुइ ल्वापु जूगु खः ।

सुरक्षा सल्हाकारया प्रवक्तां धाःगु दु, ‘प्रथम महिलाया ज्याकुथिं ह्वाइट हाउसय् सुरक्षा सल्हाकार रिकार्डेलया आवश्यक मदु धायेधुंकूगु दु ।’
मेखे ह्वाइट हाउस व राष्ट्रिय सुरक्षा परिषदं धाःसा थ्व घटनायात कयाः छुं न्ववाःगु मदुनि ।

मेलेनियालिसे ल्वापु याःम्ह डेपुटी राष्ट्रिय सुरक्षा सल्हाकार मीर रिकार्डेल वंगु न्हय्ला न्ह्यवनिसें राष्ट्रिय सुरक्षा सल्हाकार जोन बोल्टनया नेतृत्वय् दुगु शक्तिशाली सुरक्षा परिषद्य् च्वना ज्या यानाच्वंम्ह खः । अमेरिकी मिडियाय् वःगु खबर कथं मेलानिया व मीरा दथुइ अफ्रिका यात्राया झ्वलय् विमानय् च्वनेगु सिटया खँय् ल्वापु जूगु खः ।

थ्व भ्रमणया इलय् हे एबीसी नेटवर्कयात बिउगु अन्तर्वार्ताय् मेलानियां ह्वाइट हाउसय् छुं अज्याःपिं मनूत दु गुपिंत थःम्हं विश्वास यायेमफु धाःगु खः ।मंगलवाः द वाल स्ट्रीट जर्नलय् वःगु समाचारय् मेलानिया ट्रम्पया टिमं प्रथम महिला व ह्वाइट हाउस बारे वःगु छुं नकारात्मक प्रतिवेदनया लिउने मीरा रिकार्डेलया ल्हाः दुगु अनुमान यानाच्वंगु दु ।

पत्रिकाय् मेलानिया व रक्षा मत्री जेम्स मेटिस दथुइ नं रक्षा नीतियात कयाः विवाद जुइगु यानाच्वंगु खँ च्वःगु दु ।मेलानिया ट्रम्पपाखें पितबिउगु वक्तव्यय् धाःसा जोन केली व मेलानिया दथुइया स्वापू सामान्य दुगु खँ धाःगु दु । वक्तव्यय् धयातःगु दु, ‘चीफ केली व मय्जु ट्रम्प दथुइ स्वापू तसकं सकारात्मक दु व निम्ह दथुइ छुं विवाद मदु ।’

मेखे अमेरिकी मिडियाय् वयाच्वंगु खबर कथं राष्ट्रपति ट्रम्प ह्वाइट हाउसया वेस्ट विंगय् छुं तःधंगु हिउपाः हयेगु बारे बिचाः यानाच्वंगु दु । ह्वाइट हाउसया चीफ अफ स्टाफ जोन केली वा होमल्यान्ड सेक्युरिटी विभागया प्रमुख कस्र्टजेन नीलसनयात चिकेगु बारे ट्रम्पं बिचाः यानाच्वंगु दु ।