स्वनिगलय् ल्ह्ययेजिउगु आकाशे तां

येँ महानगरपालिकां लँजुवाःतय् चाप अप्व दुगु थासय् माइतीघर व चाबही चोकय् स्थानान्तरण याये फइगु आकाशे ताँ (फ्लाइ ओभर) निर्माण याइगु जूगु दु । येँ मनपां थुगु दँया बजेटय् १२ गू करोड तका दां न्हूगु आकाशे ताँ निर्माण यायेत फ्याःगु दु । थ्व हे बजेटपाखें अत्यावश्यक थासय् ताँ दयेकेत्यनागु येँ मनपा भौतिक पूर्वाधार महाशाखा प्रमुख इन्जिनियर रामबहादुर थापां कनादिल ।

थुपिं निगू थासय् बाहेकं मेगु गुगु थासय् आकाशे ताँया आवश्यक दु धकाः नं अध्ययन यायेगु ज्या जुयाच्वंगु दु । वय्कलं धयादिल, ‘माइतीघर व चाबहीलिपा मेमेगु थासय् नं उकथंया ताँ निर्माण यायेगु जुइ ।’ न्हापांगु चरणय् थुपिं निगू थासय् आकाशे ताँ निर्माण याइगु जूगु दु । मेमेगु थासय् नं आवश्यकता स्वयाः निर्माण यायेगु तयारी जुयाच्वंगु दु ।

थुपिं निगुलिं थासय् निर्माण यायेत्यंगु ताँया नमूना तयार जुइधुंकूगु दु । छठ पर्व सिधयेवं निर्माणया निंतिं बोलपत्र आह्वान यायेगु इन्जिनियर थापां कनादिल । चालु आर्थिक दँय् लँजुवाःतय्त अत्याधिक मात्राय् चाप खने दुगु च्यागू थासय् स्थानान्तरण याये फइगु न्हूगु आकाशे ताँ निर्माण यायेगु येँ मनपां योजना दयेकूगु खः ।

लुँहिति, न्हूगु सतक, वीर अस्पताल, रत्नपार्क–भोताहिति, जमः, रत्नपार्क–बागबजाः, पुलांगु बसपार्क, भद्रकाली व न्हूगु बसपार्कय् आकाशे ताँ संचालनय् दु । रत्नपार्कय् छगू सव–वे दु । भद्रकाली, पुलांगु बसपार्क व न्हूगु बसपार्कय् च्वंगु ताँ मर्मत यायेम्वाः । मेमेगु थासय् च्वंगु ताँ तत्काल मर्मत यायेमाःगु
अवस्था दु ।

स्वनिगःया दकलय् अप्वः यात्रुतय्सं लँ त्वाःल्हाइगु सतकया रुपय् दुगु न्हू बानेश्वर चोकय् धाःसा तत्काल आकाशे ताँ दयेकेगु योजना महानगरया मदु । प्रतिनिधिसभा भवन चोकय् लाःगु थासय् जूगुलिं सुरक्षा खतरा दये फुगु धासें उगु थासय् विकल्प मालेगु ज्या जुयाच्वंगु इन्जिनियर थापां कनादिल ।

वय्कलं धयादिल, ‘सव–वे निर्माण याये फइ ला कि धकाः जिमिसं सहलह यानाच्वनागु दु ।’दुर्घटना न्यूनीकरण व ट्राफिक व्यवस्थापनलिसें लँजुवाःतय्त सहजताया निंतिं येँ मनपां छगू थासं मेगु थासय् ल्ह्यये फइगु ताँ निर्माण यायेत्यंगु खः । ट्राफिक प्रहरी व सडक विभागलिसें तकं सहकार्य यानाः ताँ निर्माण यायेगु प्रक्रिया न्ह्याकेगु येँ मनपां न्ह्यथंगु दु ।

आकाशे ताँ दयेकेत मेमेगु सम्भावित थाय्या रुपय् टेकु भंसार, त्रिपुरेश्वर, माइतीघर, बबरमहल (येँ जिल्ला अदालत), पुतलीसतक, महाराजगंज, कोटेश्वर, गौशाला चोक दु । सवारीसाधनया अत्याधिक चाप दइगु उगु क्षेत्रय् अज्याःगु ताँया अभावय् लँजुवाःतय्त लँ त्वाःल्हायेत समस्या जुया वयाच्वंगु दु ।

लँजुवाःतय्सं लाक्वपाक्व थासं लँ त्वाः ल्हायेगु याना वयाच्वंगुलिं सवारी चापया अवस्था खने दयाच्वंगु दु । इन्जिनियर थापां कनादिल, ‘छखे लँजुवाःतय्त लँ त्वाःल्हायेत अःपुइ, मेखे ट्राफिक व्यवस्थापनय् नं सहज जुइगु खँय् शंका मदु ।’आः दयेकीगु अज्याःगु ताँय् विज्ञापन याये दइमखु । विज्ञापन तये मिले मजुइकथं हे आकाशे ताँया ढाँचा तयार जूगु व मेमेगु तयारी चरणय् दु ।

महानगरं थ्व स्वयां न्ह्यः निर्माण याःगु आकाशे ताँय् विज्ञापन यानाः आम्दानी याना वयाच्वंगु खः । सहरी सुन्दरतायात ध्यानय् तयाः येँ मनपां छुं ई न्ह्यवंनिसें लाक्वपाक्व विज्ञापन, पर्चा, पम्पलेट, पोस्टर तिकेगु ज्याय् रोक लगे याःगु दु । थ्व स्वयां न्ह्यः स्थानान्तरण याये फइगु ताँ न्हापांखुसी परीक्षणया रुपय् पुलांगु बसपार्क न्ह्यःने दयेकूगु खः ।

थौंकन्हय् येँ मनपा दुने लुँहिति, न्हूगु सतक, वीर अस्पताल, रत्नपार्क–भोताहिति, जमः, रत्नपार्क–बागबजाः, पुलांगु बसपार्क, भद्रकाली व न्हूगु बसपार्कय् आकाशे ताँ संचालनय् दु । रत्नपार्कय् छगू सव–वे दु । भद्रकाली, पुलांगु बसपार्क व न्हूगु बसपार्कय् छुं दँ न्ह्यः निर्माण याःगु ताँ मर्मत यायेम्वाःगु अवस्थाय् दु ।

मेमेगु थासय् च्वंगु ताँ तत्काल मर्मत यायेमाःगु अवस्था दुगु धाःगु दु । येँ मनपा दुने थ्व स्वयां न्ह्यः निजी ख्यलं दयेकूगु ताँया मर्मत नं निजी ख्यलं हे यायेमाःगु वय्कलं धयादिल । दक्वं पुलांगु ताँया मर्मतया निंतिं महानगरं समन्वय यानाच्वंगु दु ।

येँ मनपां चालु आर्थिक दँ २०७५÷०७६या निंतिं १३ गू अर्ब २ गू करोड १२ गू लाख स्वीन्हय्द्वः तकाया बजेट प्रस्तुत याःगु खः । थ्व अन्तर्गत भौतिक पूर्वाधार निर्माण यायेत चालु आर्थिक दँइ् प्यंगू अर्ब, खुगू करोड बजेट विनियोजन याःगु दु । दकलय् अप्वः महानगर दुनेया सतक विस्तार व मर्मतया निंतिं खर्च याइगु जुयाच्वंगु दु ।

सम्बन्धित बुखँ

LEAVE YOUR COMMENTS