बौद्ध विद्वान पं. दिव्यवज्रया शतवार्षिकी ज्याझ्वः

येँ- बौद्ध विद्वान पं. दिव्यवज्र वज्राचार्यया शतवार्षिकी समारोह जुल । नेपाःया हे पुलांगु बौद्ध संस्था धर्मोदयसभाया पूर्व अध्यक्षतकं जुयादीम्ह पं. वज्राचार्ययया शतवार्र्षिकी ज्याझ्वः लुम्बिनी बौद्ध विश्वविद्यालयया उपकुलपति प्रा. डा. नरेशमान वज्राचार्यया सभापतित्वय् जूगु खः ।

पं. वज्राचार्यया किपाय् स्वां देछासे, दीप प्रज्वलन यानाः शुरु जूगु ज्याझ्वलय् डा. स्वस्तिरत्न वज्राचार्यं लसकुस यानादीगुु खः । ज्याझ्वलय् बौद्धविद्वानपिं प्रा. डा. वज्रराज शाक्य, च्वमि लोकबहादुर शाक्य, बाखं च्वमि राजा शाक्य व संगीतज्ञ विष्णुरत्न शाक्यंपिंसं पं. वज्राचार्यया व्यक्तित्व व कृतित्वया बारे थःथःगु नुगःखँ तयादीगु खः ।

पं. वज्राचार्यया शिष्य सुक्षमरत्न शाक्यं कालचक्रया निपाः पौभाः किपा सुमति वज्राचार्ययात लःल्हानादीगु ज्याझ्वलय् बौद्ध विषयय् एम.ए. उत्तीर्ण यानादीपिं झिम्हेसित नं सम्मान याःगु खः ।

ज्याझ्वलय् सुभाय् देछायेगु झ्वलय् पियुषवज्र वज्राचार्यं पं. वज्राचार्य अनुवाद यानादीगु आपालं कृतित दुगु व उकिया प्रकाशनया निंतिं लोटस रिसर्च सेन्टरं कुतः यायेगु जानकारी बियादीगु खः ।