तोखाय् शिक्षण सहायक तालिम क्वचाल

येँ(नेपालभाषा टाइम्स)- तोखाय् न्ह्यानाच्वंगु नेपालभाषा शिक्षण सहायक प्रशिक्षक तालिम क्वचाःगु दु । तोखाया सामुदायिक व संस्थागत ब्वनेकुथिइ स्थानीय भाषाया पाठ्यक्रम अध्ययन अध्यापनया निंतिं उगु तालिम जूगु खः ।

तोखा नगरपालिकां हालया निंतिं वडा नं. २ व ३ या सामुदायिक व संस्थागत ब्वनेकुथिइ स्थानीय भासं अध्ययनअध्यापन यायेत लागू याःगु स्थानीय पाठ्यक्रम ब्वंकेत न्यान्हुया शिक्षण सहायक प्रशिक्षण बिउगु खः । नगरपालिकाया शिक्षा, खलेकुद व युवा शाखाया ग्वसालय्, नेवाः ग्वाहालि पुचः तोखा प्राविधिक सहकार्य व मातृभाषा शिक्षा अभियानया सहकार्यय् उगु प्रशिक्षण तालिम जूगु खः ।

ज्याझ्वलय् नवासें ३ वडाअध्यक्ष रमेश डंगोलं तोखाया स्थानीय भाषा, कला, संस्कृति व सम्पदाया संरक्षण यायेगु ल्याखं स्थानीया पाठ्यक्रमयात नेपालभाषां हे अध्ययन अध्यापन याकेगु जुइ धासें थुकी थःपिनिगु वडापाखें विशेष ग्वाहालि दइ धयादिल । नेपाःया संविधानं बियातःगु भाषिक अधिकारया प्रयोग यासें मातृभाषा शिक्षाया उत्थान यायेगु ज्याय् सकलें छप्पँ जुयाः न्ह्याः वनेमाःगु खँय् बः बियादिसें थःपिनिगु हे कार्यकालय् तगिं च्यागू तक अनिवार्य रुपय् थुगु विषययात लागू याना यंकेगु खँय् नं वय्कलं प्रतिवद्धता प्वंकादिल ।

शाखाया प्रमुख बाबुराम गौतमया सभापतित्वय् जूगु समापन ज्याझ्वलय् तालिमय् सहभागि शिक्षिकाद्वय सञ्जु प्रधान व विमला डंगोल, श्रीकृष्ण मानन्धर, नेवाः बस्ती नेवाः स्कुल अभियानया दीपक तुलाधर, दिपेन्द्र डंगोल, चण्डेश्वरी मा.वि.या देवकी रेग्मीं नं थःथःगु नुगःखँ तयादीगु ज्याझ्वलय् तालिमय् सहभागि शिक्षण सहायकपिंत २ वडाअध्यक्ष धर्मेन्द्र श्रेष्ठं दसिपौ लःल्हानादीगु खः ।