ने. सं. ११४३ चौलाथ्व पारू -

डोनाल्ड ट्रम्पपाखें न्हूगु सामाजिक सञ्जालया घोषणा

एजेन्सी- अमेरिकाया पूर्व राष्ट्रपति डोनाल्ड ट्रम्पं न्हूगु सामाजिक सञ्जालया घोषणा याःगु दु । ट्रम्पं थःगु हे सामाजिक सञ्जाल ‘ट्रूथ सोशल’ सार्वजनिक यायेगु घोषणा याःगु खः । ट्रम्पं थ्व सामाजिक सञ्जाल ट्विटर व फेसबुक थेज्याःगु तःधंगु प्रविधि दुगु कम्पनीया अत्याचारविरुद्ध दनीगु व अमेरिकाया ‘विद्रोही सः’यात थाय् बिइगु धाःगु दु । डोनाल्ड ट्रम्प अध्यक्ष जूगु कम्पनी ट्रम्प मिडिया एन्ड टेक्नोलोजी ग्रुप (टिएमटीजीं) थ्व सामाजिक सञ्जाल दयेकूगु खः । कम्पनीं भिडियो स्ट्रीमिङ सेवा, पोडकास्ट व समाचार सेवा नं बिइगु जुइ ।

अमेरिकाया पूर्व राष्ट्रपति डोनाल्ड ट्रम्पयात सामाजिक सञ्जाल ट्विटर व फेसबुकं निलम्बन यानातःगु दु । ट्रम्पया समर्थकत अमेरिकाया संसद भवन दुहां वंगु घटनालिपा ट्रम्पयात निगुलिं सामाजिक सञ्जालं वयात निलम्बन याःगु खः । सामाजिक सञ्जालय् निलम्बित जूगु छुं ई लिपा हे ट्रम्प थःगु हे सामाजिक सञ्जाल दयेकेगु धाःगु खः ।

सामाजिक सञ्जाल ‘ट्रूथ सोशल’ वइगु महिनाय् छुं आमन्त्रित प्रयोगकर्ताया निंतिं तयार जुइगु व सन् २०२२या न्हापांगु स्वलाया दुने अमेरिकाय् उपलब्ध जुइगु ट्रम्पया कम्पनी टिएमटीजीं जानकारी बिउगु दु । ट्रम्पं धाःगु दु ‘तालिबानतय्गु ट्विटरय् तःधंगु उपस्थिति दु, तर अमेरिकाया यःम्ह राष्ट्रपति सुम्क च्वनाच्वनेमाःगु दु । दक्वसिनं जितः न्यनी मेगु तःधंगु प्रविधि दुगु कम्पनी मदुला ? जिपि याकनं हे वयेत्यनागु दु ।’