शेयर बजाः कुहां वयाः म्युचुअल फण्डय् नं लिच्वः

येँ – शेयर बजाः लगातार कुहां वनाच्वंगुलिं सामूहिक लगानीया निंतिं नीस्वनातःगु म्युचअल फण्ड (सामूहिक कोष)या अवस्था नं खराब जुयावंगु दु । नेपाल स्टक एक्सचेञ्जय् सूचीकृत जूगु झिंस्वंगू अज्याःगु फण्ड मध्ये स्वंगूया अवस्था जक बांलाःगु दुसा ल्यंदुगु झिगूया अवस्था धाःसा आधारभूत मू स्वयां कुहां वनाच्वंगु दु ।
शेयर बजारय् अप्वः दुहां वयेमा व सामूहिक लगानीया निंतिं सहज जुइमा धकाः म्युचुअल फण्ड कार्यान्वयनय् अःगु खः ।

स्टकया कथं सिद्धार्थ इक्विटी ओरियन्टेड स्किम प्रति इकाइ भाः ११ थ्यनाच्वंगु दु । अथेहे एनएमबी सुलभ इन्भेस्टमेन्ट फण्ड १ या मू ११ तका २५ पैसा थ्यनाच्वंगु दु । अथेहे लक्ष्मी भ्यालु फण्डया प्रति इकाइ भाः १० तका २५ पैसा थ्यनाच्वंगु दु । थ्व बाहेक मेगु फुक्कं सामुहिक लगानी कोषया अवस्था आधारभूत मू स्वयां कुहां वनाच्वंगु दु । थज्याःगु कोषया प्रति इकाइ भाः १० तका जुइ, तर शेयर बजाः निरन्तर कुहां वनाच्वंगुलिं थज्याःगु कोषय् नं लिच्वः लानाच्वंगु दु ।

सिटिजन म्युचुअल फण्ड १ या प्रतिइकाइ भाः ९ तका ५२ पैसा थ्यंवंगु दु । बजाः कुहां वंगुलिं थ्व फण्डया अवस्था नं बांमलानावंगु खः । थ्व कोषया बजाः पूँजीकरण ७८ करोड ६४ लाख दु । अथेहे ग्लोबल आइएमइ समुन्नत स्कीम १ नं आधारभूत भाः स्वयां कुहां वनेधुंकूगु दु । ९० करोड ६० लाख बजाः पूँजीकरण दुगु थ्व फण्डया बजाः भाः आः प्रति इकाइ ९ तका ६ पैसा जक दु ।

बजाः कुहां वनाच्वंगुलिं लक्ष्मी इक्विटी फण्डया भाः नं प्रति इकाइ ८ तका ५६ पैसाय् कुहां वनेधुंकूगु दु । थ्व फण्डया बजाः पूँजीकरण छगू अर्ब ७० करोड दु । थ्व फण्डयात छुं ई न्ह्यव तक तसकं आकर्षक फण्ड कथं कयातःगु खः । लक्ष्मी बैंकया हे मेगु योजना लक्ष्मी भ्याल्यु फण्ड धाःसा नाफाय् दु । थ्व फण्डया भाः प्रति इकाइ १० तका १५ पैसा थ्यनाच्वंगु दु । कोषया बजाः पूँजीकरण न्यागू अर्ब ७५ करोड खः ।

नेपाल स्टक एक्सचेञ्जय् सूचीकृत जूगु झिंस्वंगू अज्याःगु फण्ड मध्ये स्वंगूया अवस्था जक बांलाःगु दुसा ल्यंदुगु झिगूया अवस्था धाःसा आधारभूत मू स्वयां कुहां वनाच्वंगु दु ।

१ अर्ब ८० करोडया बजाः पूँजीकरण दुगु नबिल बैंकया नबिल इक्विटी फण्डया अवस्था झन हे खराब दु । थुकिया भाः प्रति इकाइ ८ तका ६४ पैसाय् कुहां वयेधुंकूगु दु । थ्व हे बैंकया नबिल प्रगति फण्डया नं भाः कुहां वयाः ८ तका ६८ पैसा थ्यनाच्वंगु दु । थ्व फण्डया बजाः पूँजीकरण ६५ करोड १० लाख खः । अथेहे नबिल समृद्धि फण्ड १ या भाः ९ तका ६० पैसाय् कुहां वःगु दु । थ्व फण्डया पूँजीकरण ७२ करोड खः ।

एनआइसी एशिया बैंकं प्रवद्र्धन यानाच्वंगु एनआइसी एशिया ग्रोथ फण्डया भाः प्रति इकाइ ९ तका २६ पैसा जूवःगु दु । थ्व योजनाया बजाः पूँजीकरण ७७ करोड ३३ लाख ९५ हजार २०० खः । अथहे एनएमबी बैंकं प्रवद्र्धन यानाच्वंगु एनएमबी हाइब्रिड फण्डया बजाः नं शेयर बजाः कुहां वःलिसे कुहां वनाच्वंगु दु । ९ अर्ब ४२ करोड पूँजीकरण दुगु थुकिया भाः प्रति इकाइ ९ तका ४२ पैसा थ्यंवःगु दु ।

लगानीकर्तातय् मू आकर्षण जुयाच्वंगु थ्व योजनाय् नं लिपांगु इलय् आधारभूत मू स्वयां कुहां वःगु खः । एनएमबी बैंकं प्रवद्र्धन यानाच्वंगु एनएमबी सुलभ इन्भेस्टमेन्ट फण्डया अवस्था धाःसा सकारात्मक दु । प्रति इकाइ ३ तका २५ पैसा नाफाय् दुगु थ्व योजनाया बजाः पूँजीकरण ९९ करोड ३७ लाख ५० हजार खः ।
सानिमा बैंकं प्रवद्र्धन यानाच्वंगु सानिमा इक्विटी फण्ड नं आधारभूत मू स्वयां कुहां वयेधुंकूगु दु ।

प्रति इकाइ भाः ९ तका २३ पैसाय् कुहां वःगु थ्व योजनाया बजाः पूँजीकरण १ अर्ब १९ करोड ९९ लाख दु । अथेहे सिद्धार्थ बैंकं प्रवद्र्धन याःगु निगू योजना मध्ये छगूया प्रति इकाइ छतका नाफाय् वनाच्वंगु दुसा मेगु योजनाय् घाटाय् वनाच्वंगु दु । सिद्धार्थ इक्विटी ओरियन्टेड स्किमय् छतका नाफा जुयाच्वंगु दु । थ्व योजनाया बजाः पूँजीकरण छगू अर्ब १० करोड खः । सिद्धार्थ इक्विटी फण्डया भाः धाःसा प्रति इकाइ ९ तका २३ पैसाय् कुहां वयेधुंकूगु दु । थ्व योजनाया बजाः पूँजीकरण छगू अर्ब ३८ करोड ४५ लाख तका खः ।