गुणस्तरीय उत्पादनं निर्यात अप्वल

येँ – नेपाःया श्रम बजारय् श्रमिकया अभाव जुइवं नेपाली व्यवसायीतय्सं निर्यातजन्य उत्पादनया संख्या स्वयां गुणस्तर बांलाकेगु पाखे न्ह्यानाच्वंगु दु । नेपाःया व्यवसायीतय्सं उच्च गुणस्तरया उत्पादनय् बः बिउगुलिं संख्यात्मक रुपय् म्हो उत्पादन जूसां नं मुऽं निर्यातया दर अप्वःगु व्यापार तथा निकासी प्रवद्र्धन केन्द्रं धाःगु दु ।

केन्द्रया कथं नेपाली गलैंचा व्यवसायीतय्सं न्हापा ८० नटया गलैंचा दयेकाच्वंगु खःसा थौंकन्हय् १०० नटया बांलाःगु गुणस्तरीय कार्पेट दयेकाच्वंगु दु । अज्याःगु उत्पादन नं बांलाःगु देशय् जुयाच्वंगु दु । गुणस्तरीय सामान उत्पादन जुइवं उकिया भाः नं थिके जुइगु जूगुलिं म्हो गुणस्तरया स्वयां अप्वः ध्यबा दुहां वयेगु यानाच्वंगु दु ।

म्हो गुणस्तरया परिमाण अप्वः जूसां क्वालिटी ध्यबा मवइगु खँ धाःगु दु । न्हापा नेपालय् उत्पादन जुइगु गलैंचा ८० निसें ९० प्रतिशत जर्मनीइ वनेगु यानाच्वंगु खःसा थौंकन्हय् ५० प्रतिशत स्वयां अप्वः अमेरिकाय् निर्यात जुयाच्वंगु दु ।

नेपालय् २०७२ सालया तःभुखाय् ब्वयेधुंकाः अमेरिकां ‘एड अन ट्रेड’ अथे धइगु व्यापारपाखें ग्वाहालि यायेगु नीति नालाः सन् २०२३ तकाया निंतिं थीथी नेपाःया उत्पादनय् शुन्य भन्सार सुविधा बिउगु दु । गुकिं यानाः अमेरिकाय् गलैंचा निर्यात यायेगुलिं प्रतिस्पर्धा जुयाच्वंगु दु ।