मलेसियाय् ज्यामि छ्वयेगु निंतिं समझदारी कात्तिकय् १२ य् हस्ताक्षर

येँ – नेपाः व मलेसिया दथुइ नेपाःमि ज्यामि यंकेगु बारे समझदारीपत्र एमओयुय् हस्ताक्षर जुइगु जूगु दु । वइगु कार्तिक १२ गते निगू देय् दथुइ हस्ताक्षर जुइगु खँ धाःगु दु । उकिया निंतिं मलेसियाया मानव संशाधन मन्त्री एम कुलेसागरन कार्तिक ११ गते नेपाः वइगु खँ धाःगु दु । वयां लिपा नेपाःमि ज्यामि मलेसिया वनेगु लँपु चाली ।

ज्यामि यंकेगु झ्वलय् आपालं दलालतय्सं भिसा प्रक्रियां निसें हे नेपाःमितय् ठगे याइगु अप्वयेवं श्रममन्त्री गोकर्ण विष्टं नेपाःमि ज्यामि मलेसियाय् वनेगु प्रक्रिया दिका बिउगु खः । आः जुइगु समझादरीइ नेपाःमि ज्यामि यंकेगु झ्वलय् भिसा प्रक्रिया निसें फुक्कं खर्च मलेसियन रोजगारदातां बहोरे यायेगु समझदारी जुइगु खँ धाःगु दु ।

थ्व समझदारी लिपा नेपाःमि ज्यामि छम्हेसिया मलेसियाय् वनेगु झ्वलय् खर्च जुइगु १ लाख तक बचे जुइगु खँ धाःगु दु । एमओयुय् हस्ताक्षर लिपा नेपाःमि ज्यामि ध्यबा हे खर्च यायेम्वायेक मलेसियावने खनीगु खँ धाःगु दु । तर मेडिकल व इमिग्रेसन सेक्युरिटी क्लियरेन्सय् फेल जुल धाःसा उम्ह ज्यामि मलेसिया वने मखनिगु खँ धाःगु दु ।

फेल जुल धाःसा उगु प्रक्रियाय् खर्च जूगुु ध्यबा नं सम्बन्धित ज्यामि हे पुलेमाः । फुक्कं प्रक्रिया पास जूपिं ज्यामिया शुल्क जक मलेसियाया रोजगारदातां बेहोरे याइगु खँ धाःगु दु । आः एमओयु कथं नेपाःमि ज्यामिया करार अवधि निदँया जुइ । थ्व स्वयां न्हापा स्वदँया करार अवधि दइगु जुयाच्वंगु खः ।

ताः ई तक विदेशय् च्वनेमाःबलय् पारिवारिक व सामाजिक रुपं बिखण्डन जुइगु अप्वया वःगुलिं निदँया जक करार अवधि क्वःछिउगु खः । कम्पनीं चाहे जुल धाःसा निदँया ई थप यानाः हाकनं ज्यामि मलेसियाय् वनेफइगु खँ धाःगु दु । ज्यामि छ्वइगु म्यानपावर एजेन्सीं सेवा शुल्क वापत ज्यामिया छगू लाया बछि तलब बराबरया ध्यबा काये दइ ।

तर थ्व ध्यबा ज्या यायेत वंपिंपाखें काये मदइगु खँ धाःगु दु । श्रम सम्झौताया मस्यौदाय् उगु ध्यबा रोजगारदातां पुलेगु खँ न्ह्यथनातःगु दु । ज्यामिं नेपालय् याइगु फुक्कं प्रक्रियाय् पुलेमाःगु शुल्क रोजगारदातां बीगु सहमति जूगु दु ।