सहकारीपाखें न्हय्गू पुचःयात सम्मान

थिमि (नेपालभाषा टाइम्स)- मध्यपुर थिमि बचत तथा ऋण सहकारी संस्थाया झिंन्याक्वःगु वार्षिक साधारणसभा जुल । साधारण सभाय् मध्यपुर थिमिया न्हय्गू ऐतिहासिक, धार्मिक व सांस्कृतिक खलः पुचःयात सम्मान याःगु खः ।

सांस्कृतिक क्षेत्रय् योगदान बिउगु धासें साधारण सभाय् मध्यपुर थिमिया ऐतिहासिक नीलबाराही गंप्याखं (मध्यपुर, बोडे), लाय्कू भैलः प्याखं संचालन समिति, महाकाली प्याखं व्यवस्थापन समिति (दिगुत्वाः), थिमि गुंला बाजं खलः (वज्राचार्य समुदाय), मध्यपुर थिमि गुंला बाजं (प्रजापति समुदाय), येँयाः पुन्हिया म्ये प्वाः खनेगु जात्रा व्यवस्थापन समिति व मानन्धर गुंला बाजं (सिवा साय्मि खलःयात सम्मान याmगु खः ।

साधारण सभाय् मूपाहांकथं झायादीम्ह बागमति प्रदेशया खानेपानी, उर्जा व सिँचाइ मन्त्री वसन्तप्रसाद मानन्धरं दोसल्लां न्ययेकाः हनापौ लःल्हानादीगु खः । ज्याझ्वलय् नवासें मन्त्री मानन्धरं मध्यपुर लागाया हे गौरव यायेबहगु संस्कृतिया विकास, संरक्षण व प्रवद्र्धनय् तिबः बिउगुलिं उकिया मूल्यांकन यानाः हनेज्या याःगु च्वछायेबहजू धयादिल ।

मध्यपुर थिमि नगरपालिका ८ वडाअध्यक्ष रमेश थापा श्रेष्ठं स्थानीयस्तरय् संचालन जुयाच्वंगु सहकारी जक बचत यायेत इनाप यानादिल । लिसें वय्कलं चिचिधंगु पूँजीयात चलायमान यायेत सहकारी संस्थात गाक्कं दु धासें वार्षिक रुपं साधारणसभा, हिसाब मिलान यानाः पारदर्शी व सामाजिक उत्तरदायित्व बहन यायगु संस्थायात विश्वास याये फइ धयादिल ।

संस्थाया अध्यक्ष कृष्णकाजी मानन्धरया सभापतित्वय् मध्यपुर थिमि नगरपालिका सहकारी शाखाया छगू हे सत्रं साधारण सभा सिधयेकेगु कार्यविधिं न्ह्याःगु ज्याझ्वलय् शेयर सदस्यपिनिगु सुझाव संकलन यानाः निर्णय पारित याःगु खः ।

संस्थाया कोषाध्यक्ष प्रेमसुन्दर श्रेष्ठ व लेखा सुपरिवेक्षण समितिया सुन्दर श्रेष्ठं थःथःगु प्रतिवेदन न्ह्यब्वयादीगु ज्याझ्वलय् मिसा उपसमितिया संयोजक ललिता यलायं लसकुस यानादीगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु