चीनं स्वसःगः एयरबस न्याइगु

चीनं युरोपेली विमान कम्पनी एयरबसपाखें स्वसःगः विमान न्यायेगु सहमति याःगु दु । चिनियाँ राष्ट्रपति सी जिनपिङ्गया पेरिस भ्रमणया झ्वलय् ए ३२० व ए ३५० सिरिया एक्सडब्ल्युबी विमान न्यायेगु सम्झौता जूगु खः ।चीनया थ्व सम्झौतां अमेरिकी विमान कम्पनी बोइङ्गयात धाःसा धक्का लाइगु खँ धाःगु दु ।

इन्डोनेसिया व इथियोपियाय् जूगु निगू दुर्घटना लिपा बोइङ्गया ७३७ म्याक्स श्रृंखलाया जेट विमान थौंकन्हय् विश्वन्यंकं उडान प्रतिबन्ध याःगु छुं ई लिपा हे चीनं बोइङ्गया प्रतिस्पर्धी एयरबसलिसे खर्बौं डलरया विमान न्यायेगु सम्झौता याःगु खः ।चीनं एयरबसलिसे न्यायेत्यंगु फुक्कं विमानया मू स्वंगू खर्ब ४० अर्ब डलर तुइगु खँ धाःगु दु ।

सम्झौता लिपा एयरबस कमर्सिअल एयरक्राफ्टया अध्यक्ष गियोम फोरीं छगू विज्ञप्ति पितबिसें चीनया नागरिक उड्डयनयात ग्वाहालि यायेत थःगु सिंगल आइल व वाइडबडी विमान उपलब्ध यायेदुगु थःपिनि निंतिं सम्मानया विषय जूगु खँ धाःगु दु । युरोप भ्रमणय् वनाच्वंम्ह चीनिया राष्ट्रपति सीं वंगु वालय् इटलीया भ्रमण यानादीगु खः । थ्व इलय् इटलीं चीनया महत्वाकांक्षी योजना बेल्ट एन्ड रोड इनिसियटिभय् सहमति प्वंकूगु खः । चीनया थ्व महत्वपूर्ण योजनायात औपचारिक रुपं समर्थन याःगु इटली न्हापांगु युरोपेली देय् खः ।

 

सम्बन्धित बुखँ

LEAVE YOUR COMMENTS