विद्यार्थीयात त्यासा बीगु ग्वसाः अलपत्र
येँ – बैंकय् प्रमाणपत्र बरः तयाः त्यासा कायेगु प्रक्रिया हे अस्पष्ट जूगुलिं बैंकत अज्याःगु त्यासा बीत ग्यानाच्वंगु दु । थुकिं यानाः सरकारं तसकं महत्व बियाः हःगु उगु योजना ताःई तक नं अलपत्रय् लानाच्वंगु दु । प्रमाणपत्र बरः तयाः त्यासा बीबलय् त्यासा काःम्हेस्यां पुले मफुत धाःसा उकिया पूर्ति सुनां बीगु धइगु खँ स्पष्ट मजुयाः बैंकत त्यासा बीत लिचिलाच्वंगु खः । सरकारं आर्थिक दँ २०७४÷७५ या बजेटपाखें शैक्षिक योग्यताया प्रमाणपत्र बरः तयाः सहुलियत पूर्ण त्यासा बीगु ज्याझ्वः हःगु खः । अज्याःगु त्यासा कायेगु प्रक्रिया बुझे यायेत वंपिं विद्यार्थीतय्त बैंकतय्सं अज्याःगु त्यासा बी फइ मखु धकाः तप्यंक धायेगु यानाच्वंगु दु ।
मेखे राष्ट्र बैंकं धाःसा सरकारं हःगु योजना कार्यान्वयन जुइ धकाः आश्वासन बियाच्वंगु दु । राष्ट्र बैंकं अज्याःगु त्यासाया बारे शुक्ष्म निरीक्षण यानाच्वंगु खँ धायेगु यानाच्वंगु दु । नापं त्यासा बीत आनाकानी याइगु बैंकया बारे सुचं बिल धाःसा माःगु कारवाही यायेगु जुइ धकाः नं धयाच्वंगु दु ।
मेखे बैंकरतय्सं धाःसा सहुलियत पूर्ण त्यासा बीत प्रक्रियागत अन्यौल कायम जुयाच्वंगुलिं त्यासा बीत समस्या जुयाच्वंगु खँ धायेगु यानाच्वंगु दु ।
सरकारं शैक्षिक योग्यताया प्रमाणपत्र बरः तयाः शिक्षित युवा स्वरोजगार त्यासा, विदेशं लिहां वःपिं युवा परियोजना त्यासा, उच्च व प्राविधिक व व्यावसायिक शिक्षा त्यासा, दलित समुदाय व्यवसाय विकास त्यासा व मिसा उद्यमि त्यासा यानाः न्हय्गू शीर्षकय् त्यासा बीगु घोषणा याःगु खः ।
LEAVE YOUR COMMENTS