ने. सं. ११४४ कौलाथ्व तृतीया -

भिंतुना गुथिया वहया पाँय्म्वह पिदन

येँ – असंया भिंतुना गुथिं दँय्दसं न्हूदँया लसताय् पिथना वयाच्वंगु वहया पाँय्म्वः थुगुसी नं पिदंगु दु । थुगुसी भन्ते धम्मलोक महास्थविरया किपा कियातःगु पाँय्म्वह पिदंगु खः । शनिवाः छगू ज्याझ्वःया दथुइ अखिल नेपाल भिक्षु महासंघया उपाध्यक्ष व आनन्दकुटि विहारया प्रमुख भिक्षु धर्ममूर्ति महास्थविरं पाँय्म्वहयया उलेज्या यानाबिज्यात । ज्याझ्वलय् न्ववानाबिज्यासें वसपोलं बुद्धधर्म व नेपालभाषा थपू यायेगु निंतिं तःधंगु योगदान यानावंपिं व्यक्तित्वतय्त लुमंकेगु, वसपोलपिनि कदर यायेगु निंतिं न्हू पुस्ताया भूमिका महत्वपूर्ण जुइगु खँ धयाबिज्यात ।

गुथिया नायः उपेनकाजी शाक्यया सभापतित्वय् व छ्याञ्जे अमुलकाजी तुलाधरं लसकुस यानादीगु ज्याझ्वलय् दांभरि तारावीर सिंहं भन्ते धम्मलोकया बारे जानकारी बियादीगु खः । ज्याझ्वलय् पद्मकन्या क्याम्पसया नेपालभाषा विभागया प्रमुख प्रेमहिरा तुलाधरं भन्ते धम्मलोकया जीवनी बारे न्ववानादीगु खः ।

ने.सं. १०१० य् बूम्ह भन्ते धम्मलोक महास्थविर नेपालभाषा पुनर्जागरणया निंतिं तःधंगु भूमिका म्हितादीम्ह लिसें थेरबाद बौद्धधर्मया प्रचारय् महत्वपूर्ण योगदान यानाबिज्याःम्ह खः । बौद्धधर्मया प्रचार याःगु व नेपालभाषां सफू च्वःगुलिं वसपोल लिसें न्हय्म्ह भिक्षुपिंत तत्कालिन राणा सरकारं देश निकाला तकं याःगु खः । वसपोल भन्ते नेपालभाषां जक नीखुगू सफू च्वयाबिज्याःगु दु । वसपोलया ‘महाचीन यात्रा’ तसकं लोकंह्वाःगु सफू खः । स्वयम्भूया आनन्दकुटी विहार स्थापना यानादीम्ह वसपोल ने.सं. १०८७ इ मदुगु खः ।
ज्याझ्वलय् नेवाः न्ह्यलुवा व मानवअधिकारवादी नेता पद्मरत्न तुलाधरयात नं हनेगु ज्याझ्वः दुगु खःसां वय्कः म्हं मफयाः अस्पताल भर्ना जुयादीगुलिं वय्कःयात लःल्हाइगु हनापौ ब्वनाः न्यंकूगु खः ।