अमेरिकाय् ताम्राकारयात ‘इन्द्रलाल स्मृति’ सिरपाः

येँ -भाषा ह्यमि लिसें अमेरिकाय् च्वनाः नेपाल भाषा टाइम्सया अनलाइन अन्तर्वार्ता ज्याझ्वः ‘अमेरिकाय् नेवाः’ सञ्चालन यानादीम्ह भाजु प्रविण ताम्राकारयात थुगु दँया ‘इन्द्रलाल स्मृति पुरस्कार’ लःल्हाःगु दु । भाजु ताम्राकारं लगातार १०० गू ल्याः तक ‘अमेरिकाय् नेवाः’ सञ्चालन यानादीगुया नापनापं अमेरिकाय् च्वनाः नेपालभाषा व नेवाः जातिया उत्थानया लागिं थीथी कथं ज्या यानादीगुलिं उगु सिरपाः लःल्हाःगु खः । नांजाःम्ह वाद्यवादक इन्द्रलाल श्रेष्ठया नामं वय्कःया म्ह्याय् मगनदेवी श्रेष्ठं थ्व सिरपाः पलिस्था यानादीगु खः ।

थ्व स्वयां न्ह्यः उगु सिरपाः मह जोडी, गायिका संगिता श्रेष्ठ, नृत्यगुरु यज्ञमान शाक्य आदिपिंत बीधुंकूगु दु । सिरपाः त्याकादीम्ह ताम्राकारं थ्व सिरपालं थःगु पलाः सही दिशाय् लाः धकाः क्यंगु बिचाः तयादीगु दु ।