‘पद्मरत्न तुलाधर’ जीवनी विमोचन

येँ- नेवाः न्ह्यलुवाः लिसें नेपाःया उत्पीडित वर्गं याःगु हरेक आन्दोलनया समर्थक भाजु पद्मरत्न तुलाधर मदुगु दकिलाया पूण्यतिथि लाकाः वय्कःया जीवनी सफू विमोचन जुल । म्हिगः शनिवाः थनया राष्ट्रिय सभागृहय् मदुम्ह तुलाधरया जहान मय्जु निल शोभा तुलाधर व नेपालभाषा मंकाः खलःया नायः लिसें जनकवि दुर्गालाल श्रेष्ठं तुलाधरया जीवनी सफू ‘पद्मरत्न तुलाधर’ उलेज्या यानादीगु खः ।

ज्याझ्वलय् न्ववासें नेवाः न्ह्यलुवाः मल्ल के. सुन्दरं माओवादीपाखें न्ह्याकाच्वंगु जनयुद्धया दौरानय् शान्ति वार्ता याकेगु लागिं कुतः यानाच्वंगु इलय् संयुक्त राष्ट्र संघया प्रतिनिधितय्सं तकं नेपाः वयाः भाजु पद्मरत्न तुलाधरयात नापलानाः जक थःपिनि बिचाः दयेकीगु खँ कनादिल ।

डा. सुमित्रा मानन्धरं पद्मरत्नयात थम्हं अमेरिकाय् नापलाःबलय् वय्कलं शान्ति प्रक्रियाय् यानागु ज्यायात लिपिवद्ध याये हे माः, मखुसा लिपाया पुस्तां छुं हे सी मखु धकाः बः यानाबलय् तिनि वय्कः थःगु नुगःखँ कनेत तयार जुयादीगु खँ कनादिल ।

च्वसापासाया नायः भूषणप्रसाद श्रेष्ठं लसकुस यासें न्ह्याकूगु उगु ज्याझ्वलय् नेपालभाषा मंकाः खलःया नायः लिसें जनकवि दुर्गालाल श्रेष्ठ, भाषासेवी लक्ष्मीदास मानन्धर, मदुम्ह पद्मरत्न तुलाधरया म्ह्याय्मय्जु सुम्मिना तुलाधर, सफू च्वयादीम्ह सुरेश किरणं नं नुगःखँ तयादीगु खः । ज्याझ्वः राष्ट्रिय न्हूदँ समारोह समिति–११४० या नायः रमेश महर्जनया सभापतित्वय् जूगु खः ।