ने. सं. ११४४ कौलाथ्व तृतीया -

च्याम्पयन्स लिग रियल बुत, सिटी त्यात, युनाइटेड बराबरीइ

स्पेनिस महारथी रियल म्याड्रिड च्यापियन्स लिगया थःगु निगूगु कासाय् बूगु दु । समुह जी अन्तर्गत जूगु कासाय् रियलयात सिएसके मस्काें १—० गोलं बुकूगु खः । कासाया निगूगु मिनेटय् हे रियलया टोनी क्रुसं ब्याकपासय् याःगु गल्तीया लबः कासें निकोला भालासियां कासाया छगू जक गोल याःगु खः ।

थ्व लिपा रियलं तःगू हे गोल यायेगु कुतः याःसां सफल धाःसा मजुल । कासाया अन्तिम इलय् मस्कोया गोलकिपर इगोर एकिनफिभ निगू म्हासुगु कार्ड नयाः मैदान त्वःतूगु खः । चोटया कारणं ग्यारेथ बेलं थ्व कासा म्हिते मखन । रियलयात बुकाः मस्को समूहया शीर्ष थासय् थहांवंगु दु । थ्व समूहय् लाःगु इटलीया रोमां भिक्टोरिया प्लेजनयात ५—० गोलया तःधंगु अन्तर बुकल ।

मेखे समुह ‘एफ’या कासाय् म्यानचेस्टर सिटीं होफेनहामयात बुकूगु दु । समूह चरणया न्हापांगु कासाय् लियोन नाप पराजित जूगु सिटीं होफनहामयात २—१ बुकूगु खः। कासाया न्हापांगु मिनेटय् हे बेलफोडिलया गोलं होफेनहामं अग्रता काःगु खः । तर म्यानचेस्टर सिटीं न्हय्गूगु मिनेटय् हे बराबरीया गोल यानाबिल ।

डेभिड सिल्भाया पासय् सर्जियो अग्युराें बराबरी गोल याःगु खः । सिल्भां कासाया ८७ औं मिनेटय् सिटीया निंतिं विजयी गोल यानाबिउगु खः । थ्व समूहय् लाःगु लियोन व शाख्तर डोनेस्क दथुया कासा धाःसा २–२ गोलया बराबरीइ क्वचाःगु दु । आः लियोन ४ अकं सहित समूहया शीर्ष थासय् दु ।समुह ‘एच’य् लाःगु युभेन्ट्सं योङ ब्वाइजयात ३–० गोलं बुकल ।

युभेन्टसया निंतिं पाउले डिबालां ह्याट्रिक याःगु खः । डिबालां न्हापांगु हाफय् निगू व निगूगु हाफय् छगू गोल याःगु खः । डिबालां कासाया न्यागूगु, ३३ औंै व ६९ औं मिनेटय् गोल याःगु खः । न्हापांगु कासाय् ह्याउँगु कार्ड नःगुलिं प्रतिबन्ध लानाच्वंम्ह क्रिष्टियानो रोनाल्डों धाःसा थ्व कासा म्हिते मखन ।

थ्व समूहया मेगु कासाय् म्यानचेस्टर युनाइटेड व भ्यालेन्सिया दथुइया कासा बराबरीइ क्वचाःगु दु । अथेहे समुह ‘इ’या कासाय् बायर्न म्युनिखं अजाक्स नाप छगू छगू गोलया बराबरी म्हितल । थ्व समूहय् च्वंगु बेन्फिकां एइके एथेन्सयात ३—२ गोलं बुकूगु दु ।