वुल्भ्सपाखें चेल्सी पराजित

प्रिमियर लिग

इंग्लिस प्रिमियर लिगय् चेल्सी वुल्भ्सनाप पराजित जूगु दु । लिगया झिंनिगूगु थासय् लानाच्वंगु वुल्भ्सं चेल्सीयात छगूया विरुद्ध निगू गोलं बुकूगु खः । कासा याःगु १८ औं मिनेटय् लोफ्टस चेकया गोलं चेल्सीं अग्रता काःगु खः, तर गोल याये धुकाः नं चेल्सी दबाब लात । छगू गोलं लिउने लानाच्वंगु वुल्भ्स कासाया निगूगु हाफय् प्यंगू मिनेट दुने निगू गोल याःगु खः ।

वुल्भ्सया निंतिं ५९ औं मिनेटय् राउल जिमिनेज व ६३ औं मिनेटय् डिओगो जोटां गोल याःगु खः । चेल्सीया धाःसा थुगुसी लिगय् आःतकया दकलय् खराब कासा जूगु दु । प्रिमियर लिगया हे मेगु कासाय् म्यानचेष्टर युनाइटेड व आर्सनलं निगू निगू गोलया बराबरी म्हितल ।

निक्वः तक लिउने लायेधुंकूगु म्यानचेष्टर युनाइटेडं उत्कृष्ट प्रर्दशन यानाच्वंगु आर्सनलयात बराबरीइ पनेत ताःलाःगु खः । न्हापांगु हाफया २६ औ मिनेटय् आर्सनलया मुस्ताफीं गोल यासें आर्सेनलयात अग्रता बिउगु खः, तर थ्वयां प्यंगू मिनेट लिपा हे म्यानचेष्टर युनाइटेडं बराबरी गोल यात ।

कासाया ३० औं मिनेटय् म्यानचेष्टर युनाइटेडया निंतिं एन्थोनी मार्सलं गोल याःगु खः । निगूगु हाफया ६८ औं मिनेटय् युनाइटेडया मार्कस रोजो आत्माघाती गोल यायेवं आर्सनलं हाकनं अग्रता काल तर थ्वयां छगू मिनेट लिपा हे जेसी लिङ्गार्ड बराबरी गोल यानाः युनाइटेडयात पराजयपाखें बचे यानाबिल ।