ने. सं. ११४४ कछलागा षष्ठी -

मनपाय् मापदण्डया निवेदन द्वँ चिन

न्हापा हे निर्माण जुयाच्वंगु तर निर्माण मापदण्ड मिले मजूगु छेँयात नियमित यायेत निवदेन बीपिं निवेदकया येँ महानगरपालिकाय् चाङ खायेगु शुरु जूगु दु । करिब स्वला न्ह्यः येँ महानगरपालिकां छेँ निर्माण जूगु तर नियमिकथं निर्माण मजूगु छेँया निंतिं निवेदन बीत धासें सुचं जारी याःगु खः ।

निर्माण जुइधुंकूगु व नक्सा पास यायेगु प्रक्रियाय्तकं मवंगु निजी व सार्वजनिक लिसें सरकारी भवनयात नक्साकथं दयेकेत थुकथंया व्यवस्था यानागु येँ मनपां न्ह्यथंगु दु । नगरवासीया निंतिं थ्व छगू बांलाःगु मौका खः, थ्व मौकाया नं सदुपयोग मयात धाःसा आपालं नगरवासीया छेँ नक्साविहीन जुइगु व उगु छेँखां कायेमाःगु लबःपाखें नं द्यायेमालीगु येँ मनपां न्ह्यथंगु दु ।

नियमअनुरुप यायेगु निंतिं छेँथुवालं छेँया विवरणसहित येँ मनपाय् निवेदन बिउगु दु । उगु हे सुचंयात आधार कयाः थौंकन्हय् येँ महानगरपालिकाय् निवेदन बीपिनिगु ल्याः नं अप्वयाच्वंगु दु । थौंकन्हय् येँ मनपाय् नक्साया दक्वं ज्या अनलाइनपाखें जुयाच्वंगु दु । येँ महानगर लागा दुने आपालं छेँ नियम अःखः दनातःगुलिं अझं आपालं निवेदन दुहां वये फइगु अनुमान मनपाया दु ।

निर्माण सम्पन्न जुइधुंकूगु छेँ व भवनयात स्वंगू वर्गय् ब्वथलाः सरल मापदण्डया लिधंसाय् सुधार यायेत संशोधित मापदण्डपाखें महानगरं ज्या न्ह्याकाच्वंगुलिं निवेदन बीपिनिगु ल्याः नं अप्वयाच्वंगु खः ।

निर्माण सम्पन्न जुइधुंकूगु छेँ व भवनयात स्वंगू वर्गय् ब्वथलाः सरल मापदण्डया लिधंसाय् सुधार यायेत संशोधित मापदण्डपाखें महानगरं ज्या न्ह्याकाच्वंगुलिं निवेदन बीपिनिगु ल्याः नं अप्वयाच्वंगु खः । वंगु असार २७ क्वचाःगु नगरसभापाखें स्वीकृत भवन निर्माण मापदण्ड–२०७५ या लिधंसाय् तयार याःगु कार्यविधिया लिधंसाय् भवन इजाजत विभागं छेँथुवाःतय्पाखें निवेदन कायेगु शुरु याःगु खः ।

कार्यविधिं भवन निर्माण यायेबलय् मापदण्ड पालना मजूगु भवनयात कैफियतय् विवरण उल्लेख यानाः निर्माण सम्पन्न प्रमाणपत्र बीगु व्यवस्था याःगु दु । महानगरपालिका क्षेत्र दुने न्हूगु निर्माण जुइगु, तल्ला थप यायेगु, संरचना हेरफेर यायेमाःगु व निर्माण सम्पन्न प्रमाणपत्र जारी यायेगु ज्यायात सरल व सहज यायेत उकथंया व्यवस्था न्ह्यःने हःगु खः ।

यातायातया आवागमन, पार्किङ, खुल्ला थाय्या उपलब्धता, भवनया अवस्था, बनावट, उपयोग, भौतिक व सामाजिक सुरक्षा, जःलाखःलालिसेया सम्बन्ध थेंज्याःगु थीथी पक्षं भवन नियमित यायेत स्वयाच्वंगु खः । भवन निर्माण इजाजत विभागया प्रमुख रविन्द्रकुमार पौडेलं कनादिल ।

आवश्यक भ्वं दक्वं दत धाःसा नक्सा स्वीकृत यायेत २५ निसें ३० न्हु ई लगे जुइसा निर्माण सम्पन्न जूगु प्रमाणपत्र प्राप्त यायेत प्रक्रिया शुरु जूगु मितिं छवाःनिसें झिन्हुया ई काइ । पेश याःगु सुचंया लिधंसाय् येँ मनापाय प्रतिनिधि सम्बन्धित छेँथुवाःया छेँय् वनाः नक्सापासया प्रक्रियाय् यंकेगु ज्या जुइ ।

स्थानीय सरकार संचालन ऐनय् नक्सा स्वीकृत मयासे दयेकातःगु नियम अनुरुपया व स्वीकृत नक्सा स्वयां फरककथं दयेकातःगु छेँया निंतिं छक्वःया निंतिं विशेष व्यवस्था यायेमाःगु प्रावधानकथं येँ मनपां थुकथंया व्यवस्था याःगु खः । थ्व हे झ्वलय् येँ महानगरपालिकाय् लिपांगु इलय् नक्सा पास याकेत वइपिं नगरवासीया ल्याखय् म्होति वःगु दु ।

थगुने दछिया दुने न्हिं नीगू तक नक्सा पासया निंतिं निवेदन दुहां वयाच्वंगु खःसा थौंकन्हय् न्हिं झिगूया ल्याखं जक वयेगु यानाच्वंगु दु । येँ मनपां नक्सा पास यायेत नं छुं विशेष प्रावधान हःगु व क्रमिक रुपय् येँ मनपा दुने भवन निर्माण यायेगु जमीनया अभावया कारणं नं नक्सा पास यायेत वइपिनिगु ल्याः म्हो जुयाच्वंगु येँ मनपाया धापू दु ।

निर्माण सम्पन्न प्रमाणपत्र विना निर्माणाधीन भवनपाखे गुगुं नं बैंक वा वित्तीय सम्बन्धित ज्या याये मदइगु जूगुलिं लिपांगु इलय् निर्माया सम्पन्न प्रमाणपत्र काइपिं नगरवासीया ल्याः न्हियान्हिथं अप्वयाच्वंगु दु । छगू तथ्यांककथं ९० प्रतिशत स्वयां अप्वः भवन मापदण्ड अःखः निर्माण जुयाच्वंगु दु ।