लानिपुखू न्हूगु शैलीं दयेकीगु !

पुलांगु शैलीं दयेकेगु मनपाया ग्वसाःयात पुरातत्वया पंगः

येँ – लानिपुखू दथुइ च्वंगु बालगोपालेश्वर देगः तःभुखाय् न्ह्यः गुगु शैलीं दयेकातःगु खः आः वहे शैलीं उकिया पुनर्निर्माण याइगु जूगु दु । थुकिया लागिं पुरातत्व विभागं अन ज्या नापं शुरु यानाच्वंगु सीदुगु दु । लानिपुखू दथुइ च्वंगु देगः पुलांगु शिखर शैलीं दयेकेमाः धकाः येँ मनपां गठन याःगु विज्ञतय्गु पुचलं सुझाव बिउगु खः ।

लिसें मनपां नं शिखर शैलीं हे दयेकेगु धकाः निर्णय याःगु खः । तर पुरातत्व विभागं उकियात माने मयाःगु खःसा आः पुरातत्वं हे विज्ञ पुचःया सुझावयात अस्वीकार यासें २०७२ या भुखाय् न्ह्यःया शैलीं हे दयेकेगु ज्या यानाच्वंगु खः । लानिपुखू पुनर्निर्माणया झ्वलय् अन कंक्रिट छ्यलाः देगः दनेवं विवाद ब्वलंगु खः । तर विवाद लिपा नं आः शिखर शैली मजुसें गुम्बज शैलीं हे दयेकाच्वंगु खः ।

पुरातत्व विभागया प्रवक्ता राम बहादुर कुंवरं गुम्बज शैलीं हे लानिपुखू पुनर्निर्माण जुयाच्वंगु खँ ‘नेपालभाषा टाइम्स’ यात कनादिल ।अथेहे लानिपुखू कंक्रिट छ्यलाः दयेकाच्वंगु खँ सार्वजनिक जुइवं उकिया विरोध यानादीम्ह येँ मनपाया उपमेयर हरिप्रभा खड्गी श्रेष्ठं नं शिखर शैलीं दयेकेगु ज्या थाकुइगु जूगुलिं आःया शैलीं हे लानिपुखू दयेकेगु ज्या जुयाच्वंगु खँ कनादीगु दु ।

‘नेपालभाषा टाइम्स’ लिसे खँ ल्हासें वय्कलं धयादिल, ‘बालगोपालेश्वर देगः आः गुगु शैलीइ दु उकिया विरोध यानागु मखुसें लानिपुखू छचाःखेरं कंक्रिट ढलान याःगुलिं जक विरोध यानागु खः ।’मनपाया मेयर विद्यासुन्दर शाक्यं धाःसा थःपिंसं विज्ञ पुचःया सुझाव कथं शिखर शैलीं हे देगः दने धयाबलय् पुरातत्व विभागं पंगः थं वःगु खँ कनादिल । लानिपुखू पुनर्निमाणया निंतिं वइगु जेठ १५ गते शिलान्यास यायेगु जुइ धकाः संस्कृति मन्त्री रविन्द्र अधिकारीं मरु सतः पुनर्निर्माणया क्षमा पुजा जूथाय् घोषणा यानादीगु खः ।