ने. सं. ११४४ कौलाथ्व एकादशी - चालं

शरणार्थी काण्डय् सरकारी वकिलतय् बहस क्वचाल

येँ (नेपालभाषा टाइम्स)- नक्कली भुटानी शरणार्थी प्रकरणय् न्ह्यानाच्वंगु थुनछेक बहसय् सरकारी वकिलतय् बहस म्हिगः क्वचाल । सरकारी वकिलपाखें बहस क्वचायेवं आः प्रतिवादीपाखेया वकिलतय्सं बहस शुरु याइगु जूगु दु ।

जिल्ला अदालतया न्यायाधीश प्रेमप्रसाद न्यौपानेया इजलासय् न्ह्यानाच्वंगु बहसय् थुगु प्रकरणया प्रतिवादीयात त्वःतल धाःसा प्रमाण नष्ट जुइ फइगु व जाहेरीकर्ताया सुरक्षाय् खतरा जुइ फइगु धासें कुनाः हे मुद्दाया पुर्पक्ष यायेमाःगु जिकिर सरकारी वकिलतय्सं याःगु दु ।

नक्कली भुटानी शरणार्थी प्रकरणय् दुथ्याःगु द्वपनय् ज्वनातःपिं पुलांम्ह उपप्रधानमन्त्री टोपबहादुर रायमाझी, पुलांम्ह गृहमन्त्री बालकृष्ण खाँण सहित झिंच्याम्हेसित थुनछेक बहसय् उपस्थित याकूगु खः । थुनछेक बहस थ्वहे जेठ ३१ गते तक जारी जुइगु व वयां लिपा पुर्पक्षया नितिं कुनेगु नितिं छ्वयेगु वा मछ्वयेगु धइगु बारे निर्णय काइगु खँ धाःगु दु ।

जिल्ला सरकारी वकिलया कार्यालय येँनं ज्वंपिं झिंच्याम्ह सहित बिसिउँ वनाच्वंपिं १२ म्हेसित संगठित अपराध, कीर्ते, ठगी व राज्य विरुद्धया अपराध लगायत प्यंगू द्वपं बियाः २७ करोड ५० लाख बिगो माग सहित जिल्ला अदालत येँय् वंगु जेठ १० गते मुद्दा तःगु खः ।

थ्वहे झ्वलय् म्हिगः जाहेरीवालापाखें बहस याःपिं वकिलतय्सं नं प्रतिवादीयात थुनाय् तयाः मुद्दा न्ह्याकेमाःगु खँ धाःगु दु । म्हिगः बहसय् ब्वति कासें वरिष्ठ अधिवक्ता धु्रवलाल श्रेष्ठं अभियुक्ततय् सुरक्षाया नितिं नं कुनाः हे मुद्दा न्ह्याकेमाःगु तर्क यानादीगु खः । वय्कलं धयादिल, ‘पिने आक्रोश दु, प्रतिवादीया हे सुरक्षाया नितिं जूसां नं कुनाः हे मुद्दा प्रक्रिया न्ह्यःने न्ह्याकेमाः, प्रतिवादीतय्त धरौटी त्वःतल धाःसा अदालत व न्याय प्रति हे वितृष्णा हयेफइ ।’

उकथं हे अधिवक्ता राधिका चौलागाईंनं जाहेरवालात तसकं पीडाय् दुगु व उपिं आक्रोशित तकं जुयाच्वंगु धासें प्रतिवादीयात खतरा जुइफइगुलिं हे कुनाः मुद्दा न्ह्याकेमाःगु तर्क यानादीगु खः ।