प्रधानमन्त्रीया तस्बिर शेयर याःम्ह कर्मचारी ज्वन

येँ – प्रधानमन्त्री केपी ओली किपा स्यंकाः फेसबुकय् शेयर यात धकाः छम्ह सरकारी कर्मचारीयात हे ज्वंगु दु । काभ्रे रोशी गाउँपालिका ५ य् वडासचिव जुयाच्वंम्ह होमनाथ सिग्देलयात महानगरीय अपराध महाशाखां समाजय् नकारात्मक दृष्टिकोण न्यंकेगु ज्या याःगु धासें ज्वंगु खः ।

वयात ख्वपया सूर्यविनायकय् च्वंगु वयागु छेँनं ज्वनायंकूगु खः । महाशाखाया प्रहरी उपरीक्षक नरेन्द्रप्रसाद उप्रेतीं समाजय् नकारात्मक दृष्टिकोण न्यंकेगु कथं तस्बिर शेयर याःगुलिं ज्वनागु खँ धाःगु दु । ‘प्रधानमन्त्रीयात लक्षित यानाः भ्रम न्यंकेगु कथं फेसबुकय् फोटो शेयर याःगुलिं ज्वनागु खः’ एसपी उप्रेतीं धयादीगु दु ।

नायब सुब्बा पदय् ज्या यानाच्वंम्ह सिग्देलयात विद्युतीय कारोवार ऐन २०६३ या दफा ४७ कथं गैरकानुनी खँ प्रकाशन याःगु ज्याय् संलग्न धयागु अभियोगय् कारवाही न्ह्याःगु खँ धाःगु दु । थ्व व्यवस्था कथं छगू लाख जरिवाना व न्यादँ तक कैद वा निगुलिं सजाय जुइफु ।

मुलुकी ऐनयात विस्थापित यानाः लागू याये हःगु न्हूगु संहिताय् नं सामाजिक सञ्जाल चले याइपिंत व पत्रकारिता याइपिंत तकं तसकं थाकुगु बुँदात दुथ्याकाः कसुर यात धाःसा तःधंगु कारवाही याये फइगु बुँदात दुथ्याकातःगु दु । सामाजिक सञ्जालय् कसुर याइपिंत बीगु दण्ड पत्रकारिता याइपिंत बीगु दण्ड स्वयां यक्व खः ।