महाकवि सिद्धिदास महाजुया १५५ क्वःगु बुन्हि हन

येँ(नेपालभाषा टाइम्स)- महाकवि सिद्धिदास महाजुया १५५ क्वःगु बुन्हिया लसताय् म्हिगः नसंचा उलेगु ज्या जुल । नेपालभाषा मंकाः खलः, येँ व सिद्धिदास स्मृति समाजया मंकाः ग्वसालय् जूगु नसंचा उलेगु ज्याझ्वः थनया भोताहिति दुवातं न्ह्याःगु खः ।

भोताहितिं रत्नपार्क वनेगु दुवातय् च्वंगु महाकवि सिद्धिदास महाजुया झ्वाताय् मंकाः खलःया नायः जनकवि दुर्गालाल श्रेष्ठ, मंकाः खलः न्वकु, नेपालभाषा एकेदेमिया भाइस चान्सलरलिसें नेवाः न्ह्यलुवा मल्ल के. सुन्दर, मंकाः खलःया दांभरिं गणेश साय्मि, समाजया छ्याञ्जे दीपक तुलाधर, बागमति प्रदेश सांसद राजेश शाक्य, येँ महानगरपालिका २७ वडाअध्यक्ष योगेशकुमार खड्गीपिंसं माल्र्यापण यानादीगु खः ।

महाकवि सिद्धिदासया झ्वाताय् माल्र्यापणलिसें न्ह्याःगु नसंचा उलेज्या भोताहिति, असं, त्यःर, थँहिति, छत्रपाति, त्यंघः, न्यत, किलाघः, भ्याःचाद्यः, वंघः जुयाः केलत्वाः (जनबहाः)लय् थ्यंकाः क्वचायेकूगु खः ।

जनकवि दुर्गालालं सिद्धिदासया बुन्हिया लसताय् च्वयादीगु ‘थौंया दिन कवि गुरु सिद्धिदास बूगु रे !’ ब्याहांचुलि म्येँ हालाः नसंचा उलेगु ज्या जूगु खः । नसंचा उलेज्याझ्वलय् मंकाः खलः व स्मृति समाजया पदाधिकारी, लिसें आपालं भाषाह्यःमिपिं नापं जगतसुन्दर ब्वनेकुथि, श्री महांकाल मा.वि., जुद्धोदय माध्यमिक विद्यालय, अन्नपूर्ण माध्यमिक विद्यालयया विद्यार्थी शिक्षक, शिक्षिकापिनि सहभागिता दुगु खः ।

केलत्वालय् थ्यंकाः सुभाय् देछायेगु झ्वलय् नांजाःम्ह म्येँ हालामि योगेश्वर अमात्यं सिद्धिदासया बुन्हिया लसताय् दँय्दसं चिनाखँ कासा यायेगु व उकिया निंतिं निगू लाख तका दां दँय्दसं बीगु घोषणा यानादीगु खः । वय्कलं चिनाखँ कासाय् न्हापयात छगू लख, लिउयात न्यय्द्वः व लियांलिउयात नीन्याद्वः तका दां सिरपाः बीगु व ल्यं दुगु नीन्याद्वः तका दां ज्याझ्वःया व्यवस्थापनया निंतिं बीगु घोषणा यानादीगु खः ।