
इरानया सेनां पूर्वी सिरियाय् मिसाइल आक्रमण यानागु खँ धाःगु दु । छुं न्हि न्ह्यव इरानया अहवाज मिलिट्री परेड जूगु आक्रमणया बदला स्वरुप थ्व आक्रमण जूगु खँ धाःगु दु ।इरानया सरकारी टेलिभिजनं धाःकथं थ्व मिसाइल आक्रमण सीमा लिक्क लाःगु अबलु कमाल शहरय् जूगु खः । थ्व मुस्मां आतंककारी संगठन इस्लामिक स्टेटनया प्रभाव दुगु थाय् खः ।
वंगु सेप्टेम्बर २२ य् इरानया अहवाजय् जूगु आक्रमणया जिम्मेवारी आइएस व अरब पृथकतावादी संगठनतय्सं काःगु दु । थ्व आक्रमणय् २५ म्ह मनूतय् ज्यान वंगु खः ।इरान सरकारं थ्व आक्रमणय् अमेरिका लिसें खाडी देय्तय्सं समर्थन यानाच्वंगु पृथकतावादी पुचलं याःगु द्वपं बिया वयाच्वंगु दु । अमेरिकी रक्षामन्त्री जिम म्याटिसं थ्व द्वपं आधारहिन धायेधुंकूगुु दु ।
इरानया सेनां सोमवाः थःपिनिगु मिसाइल युनिटं सिरियाया युफरेट्स खुसीया पूर्व पाखेया इलाकाय् आक्रमण याःगु व अहवाजय् आक्रमण याःपिं प्रमुख नेतातय्त लक्षित यानाः थ्व आक्रमण जूगु खँ धाःगु दु । सेनां जमीनं जमीनय् कयेकीगु ब्यालेस्टिक मिसाइलपाखें सोमवाः स्थानीय ई कथं २ बजे आक्रमण याःगु खः ।
अथेहे दुश्मनयाथाय् अप्वः क्षति यायेगु निंतिं उमिसं गोलावारुद भण्डारण यानातःथाय् यक्व आक्रमण जूगु खँ धाःगु दु । इरानं थःपिनिगु गुगु थासं मिसाइल कयेकागु खँ मधाःसां थःपिंसं कयेकागु मिसाइलं ५७० किलामिटर दूरी पार याना वंगु खँ धाःगु दु ।
LEAVE YOUR COMMENTS