भारतय् झिंन्यादँ दुम्ह मिसामचायात बलात्कार याःगु द्वपनय् २८ म्हेसित ज्वन

एजेन्सी- भारतया मुम्बइलय् झिंन्यादँ दुम्ह मिसामचायात सामूहिक बलात्कार याःगु द्वपनय् पुलिसं ३३ म्ह अरोपित मध्ये २८ म्हेसित ज्वंगु दु । प्रहरीं ज्वंपि निम्ह नाबालक खः । प्रहरीं बिउगु जानकारीकथं वंगु जनवरीनिसें उम्ह मिसामचाया बलात्कार जुयाच्वंगु खः ।

भारतीय सञ्चार माध्यमतय्सं बिउगु जानकारीकथं मिसाया ययेकातःम्ह मिजनं दकलय् न्हापां बलात्कार याःगु व उकिया भिडियो दयेकूगु खः । वया लिपा उम्ह मिजं व मिजंया पासापिंसं मिसायात भिडियो क्यनाः ब्ल्याकमेल यानाः लगातार बलात्कार याना वयाच्वंगु खः ।

प्रहरीं बिउगु जानकारीकथं मिसायात डोम्बीभिली, बदलापुर, मुर्वाद व राबालेय् बलात्कार याःगु खः । मिसामचां बलात्कार याःपिं अप्वथें न्हापानिसें म्हसिउपिं जूगु प्रहरीं धाःगु दु । वंगु जनवरीनिसें थःत बलात्कार जुयाच्वंसां मिसामचां वंगु बुधवाः तिनि प्रहरीइ उजुरी तःगु खः ।

सन् २०१२ य् जूगु निर्भया बलात्कार घटना लिपा भारतय् बलात्कारया मुद्दाय् कडा कानून हःगु खःसां बलात्कारया घटना धाःसा म्हो जूगु मदुनि । भारतया राष्ट्रिय अपराधया तथ्यांककथं सन् २०२० य् जक २८ द्वः व ४६ गू मुद्दा दर्ता जूगु दु । यक्व घटना ला दर्ता मजुइगुलिं थ्व ल्याः अझ अप्वइगु निश्चित दु ।