फाइभस्टार होटलय् मनाङया आलु

मनाङ – मनाङय् सयेकूगु अर्गानिक आलु देशया थ्रीस्टार निसें फाइभस्टार होटलय् तक खपत जुयाच्वंगु दु । येँया हयाट, सोल्टी होटलं तकं मनाङया आलु हयाः पर्यटकतय्त तकाच्वंगु दु । वंगु छुं दँ न्ह्यवनिसें मनाङया आलुया चर्चा सुरु जूगु खः । दँय् छगू मौसमय् जक बाली जुइगु मनाङय् आलु हे मू बाली जुयाच्वंगु दु । हिमाली लःफसय् उत्पादन जूगु आलु तसकं साइगु जूगुलिं यक्वसिनं ययेकाच्वंगु दु ।

अर्गानीक खेती जुइगु थ्व थासय् छुं नं कथंया विषादी नं छ्यलीमखु । मनाङया फुक्क थासय् आलुया उत्पादन बांलाक जू । मनाङया आलु जिल्ला व देय् दुने जक मखु विदेशं तकं माग याना हयाच्वंगु दु । विशेष यानाः होटलतय्सं थनया आलुया माग याना हयाच्वंगु दु । मनाङ वइपिं आन्तरिक व बाह्य पर्यटकतय्सं नं थनया आलु तसकं ययेकूगु खँ स्थानीय होटल व्यवसायी विनोद गुरुङं कनादिल ।

थन आलु पीबलय् नं बजारं न्यानाहःगु पुसा तइमखु, थःपिंसं दयेकूगु पुसा पिनाः आलु सयेकी ।थौंकन्हय् मनाङया थीथी थासय् स्थानीयवासीत आलु लिइगु व्यस्त जुयाच्वंगु दु । क्वय्या मनाङय् अप्वः थें छेँय् छेँय् आलु लिइधुंकूगु दुसा च्वय्या मनाङय् नं आलु लिइगु सुरु जूगु दु । क्वय्या क्षेत्रय् भदौ महिनाय् हे आलु लीसा च्वय्या क्षेत्रय् असोजय् आलु ली । फागुन चैतं पिउगु आलु खुला दुने लीत तयार जुइ ।

थनया आलु न्यायेत व्यवसायीत बुँइ बुँइ हे थ्यनाच्वंगु खँ स्थानीय कृषक सोलबहादुर गुरुङं कनादिल । चामे गाउँपालिका २ थानचोकया यज्ञा घलेया कथं व्यापारी व आन्तरिक पर्यटकतय्सं आलु न्याना यंकीगुलिं आलु पिइपिं थनया किसानतय्त नं फाइदा हे जुयाच्वंगु दु ।थन वयाच्वंपिं कर्मचारीत नं नखःचखःबलय् छेँय् वनेत आलु हे ज्वनाः लिहां वनेगु यानाच्वंगु दु ।

थानचोकया बिन घलें थुगुसी जक ५० मुरी आलु सयेकूगु दु । वय्कलं धयादिल, ‘न्यादँ खुदँ न्ह्यव मोटर चले मजूबलय् आलु खपत यायेत हे थाकुइगु । गुलिसिनं ला सायात नकाछ्वइगु । थौंकन्हय् अज्याःगु समस्या मदु । मनाङ चाःहिउवःपिंसं नं आलु न्यनाः यंकाच्वंगु दु ।’तर थुगुसी धाःसा मनाङ–लमजुङ्गया लँ स्यंगुलिं थःम्हं सयेकागु आलु बजारतक थ्यंकेत धाःसा समस्या जूगु खँ वय्कलं कनादिल ।

नासो गाउँपालिकाया ओडार गामय् मिसा पुचलं नं आलु पिइगु यानाच्वंगु दु । आलु मियाः वःगु आम्दानीं गामय् सरसफाइ यायेगु, लँ दयेकेगु व मिस्तय् आयआर्जनय् ग्वाहालि यानाच्वंगु खँ पुचःया अध्यक्ष बेलकासी गुरुङं कनादिल । न्हापा न्हापा केँ, जाकि, चि व चिकं ज्वनाः थहां वइपिं व्यापारीतय्सं आलु, छ्व, फापर हिलाः यंकीगु खः । थौंकन्हय् गाडी चले जूगुलिं थनया आलु येँ तक थ्यनाच्वंगु खँ स्थानीय विनोद गुरुङं कनादिल ।

वय्कःया कथं थनया रैथाने आलु थौंकन्हय् देय्न्यंकं न्यना वनेधुंकूगु दु । मनाङय् उत्पादन जूगु आलु फछिया १३० तका थ्यनाच्वंगु दुसा थन आलु उत्पादन नं अप्वयाच्वंगु दु । कृषि विकास कार्यालय मनाङया कृषि प्रसा अधिकृत रामकुमार साहया कथं आलु पीपिं किसान व आलु उत्पादन दँय्दसं अप्वया वनाच्वंगु दु । आलुया बजार दुगुलिं मनाङ्गेंत आलु पीत लालायित जुयाच्वंगु दु ।आर्थिक दँ २०७४–७५ य् ६८१ हेक्टर बुँइ आलु पिनाः ८४२० टन आलु उत्पादन याःगु खः ।

मनाङया आलु जिल्ला व देय् दुने जक मखु विदेशं तकं माग याना हयाच्वंगु दु । विशेष यानाः होटलतय्सं थनया आलुया माग याना हयाच्वंगु दु ।

सम्बन्धित बुखँ

LEAVE YOUR COMMENTS