३.३३ प्रतिशतं त्यासा

येँ – राष्ट्रिय वाणिज्य बैंकं अधिकतम ३.३३ प्रतिशतं हे त्यासा बीगु शुरु याःगु दु । बैंकं सरकारं हःगु एकीकृत सहुलियत त्यासा ज्याझ्वः लिसे सम्बन्धित परियोजना बरः तयाः बीगु थुगु योजना म्हिगः निसें शुरु याःगु खः ।

म्हिगः राष्ट्रिय वाणिज्य बैंकया केन्द्रीय ज्याकुथीइ ग्वसाः ग्वःगु पत्रकार सम्मेलनय् बैंकया अध्यक्ष व सञ्चार तथा सूचना प्रविधि मन्त्रालया सचिव महेन्द्रमान गुरुङं भीमप्रसाद अधिकारीयात शिक्षित युवा स्वरोजगार त्यासा व रजनी आयुयात उच्च प्राविधिक तथा व्यवसायिक शिक्षा त्यासाया चेक हस्तान्तरण यासें त्यासा बीगु शुरु याःगु खः ।

बैंकं भुखाचं पीडितयात निजी आवास दयेकेत, उच्च व प्राविधिक लिसें व्यवसायिक शिक्षा त्यासा, शिक्षित युवा स्वरोजगार त्यासा, विदेशं लिहां वःपिं ल्याय्म्ह परिचालन त्यासा, दलित समुदाय विकास त्यासा, महिला उद्यमशील त्यासा व व्यावसायिक कृषि लिसें पशुपन्छी शीर्षकया त्यासाय् ३.३३ प्रतिशत व महिला उद्यमशीलता त्यासाय् २.३३ प्रतिशत त्यासा बीगु घोषणा याःगु दु ।

उगु त्यासा अप्वलय् ५ करोड तका तक जुइगु खँ धाःगु दु । राष्ट्रिय वाणिज्य बैंकया थौंकन्हय्या आधार ब्याजदर ६.३३ प्रतिशत दु । उकी २ प्रतिशत जोखिम वापत प्रिमियम थप याये दइगु नियम दु । सरकारं उकि मध्ये महिला उद्यामशीलता त्यासाय् ६ प्रतिशत व मेगु त्यासाया हकय् ५ प्रतिशत ब्याज अनुदान बिउगुलिं त्यासा काइपिंसं म्हो जक ब्याज पूसां गाःगु खः ।

राष्ट्रिय वाणिज्य बैंकं भुखाचं पीडितया निजी छेँ दयेकेगु निंतिं अप्वलय् ३ लाख तका, उच्च व प्राविधिक लिसे व्यवसायिक शिक्षा त्यासाया निंतिं ५ लाख तका, शिक्षित युवा स्वरोजगार त्यासाया निंतिं अप्वलय् ७ लाख तका, विदेशं लिहां वःपिं युवा परिचालनया निंतिं अप्वलय् १० लाख तका, महिला उद्यमशील त्यासाया निंतिं १५ लाख तका व व्यवसायिक कृषि लिसें पशुपन्छी त्यासाया निंतिं अप्वलय् ५ करोड तकाया त्यासा बीगु व्यवस्था याःगु दु ।

त्यासा कायेगु निंतिं थम्हं कायेत्यनागु त्यासाया प्रकार, माःगु ध्यबा व माःगु भ्वँ सहित थः लिकसं लाःगु शाखाय् आवेदन बीफइगु खँ धाःगु दु । आवेदकं बैंकं उपलब्ध त्यासा फारम जायेकाः बैंकं हे उपलब्ध याःगु परियोजनाया प्रस्ताव ढाँचा कथं प्रस्ताव पेश यायेमाः । त्यासा परियोजनाया प्रकार व माग याःगु ध्यबाया आधारय् किस्ताबन्दीइ बीगु खँ राष्ट्रिय वाणिज्य बैंकं धाःगु दु ।