वाणिज्य बैंकं भारतं त्यासा हये फइगु

येँ – नेपाल राष्ट्र बैंकं वाणिज्य बैंकतय्त बिनाधितो १ प्रतिशत ब्याजं भारतीय बैंक व वित्तिय संस्थां त्यासा कायेफइगु खँ धाःगु दु । त्यासा बीम्हं लगे याइगु मेगु शुल्क लिसें त्यासाया ब्याजदर १ प्रतिशत स्वयां अप्वः मजुइगु कथं ब्याजदर क्वःछीमाःगु व गुगुं नं कथंया शुल्क व कमिसन नं बीमदइगु खँ धाःगु दु ।

नवीकरणीय ऊर्जा, पर्यटन, कृषि क्षेत्र व लघुवित्त क्षेत्रय् त्यासा बीत भारतीय बैंक व वित्तिय संस्थापाखें त्यासा हयेफइगु व्यवस्था याःगु खः । केन्द्रीय बैंकया विदेशी विनिमय व्यवस्थापन विभागं मंगलवा छगू सूचं जारी यासें त्यासा प्रवाह यायेगु प्रयोजनया निंतिं वित्तिय साधनया प्रबन्ध यायेत भारतीय बैंक व वित्तिय संस्थापाखें त्यासा काये दइगु व्यवस्था यानागु जानकारी बिउगु खः ।

भारतीय मुद्राय् त्यासा कायेबलय् मेगु परिवत्र्य विदेशी मुद्राय् त्यासा काःगु जूगु उकियात नं मुक्कं थःगु प्राथमिक पुँजीया ५० प्रतिशतया सीमा दुने दयेमाःगु व्यवस्था नं याःगु दु । तर वाणिज्य बैंकतय्सं नवीकरणीय ऊर्जा अन्तर्गत जलविद्युत, सौर्य ऊर्जा, वायु ऊर्जा, प्रसारण लाइन दयेकेगु, भौतिक पूर्वाधार अन्तर्गत सुरुङ मार्ग दयेकेगु, विमानस्थल, केवलकार, तां, छेँ बुँइ त्यासा अज्याःगु त्यासा बी दइमखु ।

राष्ट्र बैंकं क्वःछिनातःगु पुँजी कोष कायम याःगु बैंकं अज्याःगु त्यासा कायेत सञ्चालक समितिं निर्णय यायेमाः । बैंक वित्तिय संस्थायात अन्तर्राष्ट्रिय रुपय् वित्तिय कारोबार यायेत गुगुं नं कथंया पंगः वा प्रतिबन्ध जूगु जुइ मजिउगु, अज्याःगु त्यासाया भुक्तानी म्होति दछि व अप्वलय् न्यादँ जुइमाः । राष्ट्र बैंकं स्वीकृति बिल धाःसा अज्याःगु त्यासाया नवीकरण धाःसा जुइफइगु खँ धाःगु दु ।

अज्याःगु त्यासाया निंतिं गुगुं नं कथंया बरः तयेगु, जमानत बीगु, बैंक ग्यारेन्ट बी दइमखु । अथेहे त्यासा कायेत केन्द्रीय बैंकया स्वीकृति कायेमाःगु व्यवस्था यानातःगु दु । लिसें अज्याःगु त्यासा दुहां वल धाःसा उकियात राष्ट्र बैंकय् लेखांकन यायेमाः ।