तामाकोशी–५यात एआइआइबीया त्यासा

येँ – १०१ मेगावाट क्षमताया तामाकोशी पाँचौ जलविद्युत आयोजनाय् लगानी यायेत एसियाली पूर्वाधार लगानी बैंक –एआइआइबी) तयार जूगु दु । अर्थमन्त्री डा. युवराज खतिवडां थ्व आयोजनाय् ग्वाहालि यायेत एआइआइबी तयार दुगु खँ कनादीगु खः । एआइआइबीया स्वक्वःगु गभर्नर्स बैठकय् नेपालं थ्व आयोजनाया निंतिं १५ अर्ब तका लगानी यायेत प्रस्ताव तःगु खः ।

नेपाःया प्रस्ताव कथं बैंक त्यासा बीत तयार जूगु खँ अर्थमन्त्रीं जानकारी बियादीगु खः । स्वला न्ह्यव भारतय् जूगु बैठकय् अर्थमन्त्री खतिवडां थ्व प्रस्ताव न्ह्यब्वयादीगु खः ।माथिल्लो तामाकोशीया क्यास्केड प्रोजेक्ट कथं थ्व आयोजना न्ह्याकेत्यंगु खः । जर्मन परामर्शदाता ल्हामेहरं विस्तृत इन्जिनियरिङ्ग व ड्रइङ्गया ज्या यानाच्वंगु दु ।

थ्व आयोजना ठेक्काय् यंकेगु निंतिं माःगु भ्वँ दयेकेत नं थ्व हे कम्पनीयात जिम्मा बियातःगु दु ।माथिल्लो तामाकोशी आयोजनां मत उत्पादन यायेधुंकाः पिहां वःगु लःयात हाकनं तप्यंक खुसिइ हे मछ्वसे थ्व आयोजनाय् छ्वयेगु कथं तामाकोशी पाँचौ आयोजना दयेकेत्यंगु दु ।

तामाकोशी आयोजना दयेके क्वचाये न्ह्यव हे थ्व आयोजनाया निंतिं लः यंकेगु संचरना दयेकेगु निर्णय नेपाल विद्युत प्राधिकरणया कार्यकारी निर्देशक कुलमान घिसिङ्गं यानातयेधुंकूगु दु ।