बैंकतय्सं सहायक कम्पनी चायेकाः शेयर कारोवार याये दइगु

मौद्रिक नीति सार्वजनिक

येँ – नेपाल राष्ट्र बैंकया गभर्नर चिरञ्जीवी नेपालं बुधवाः आर्थिक दँ २०७५ ÷७६या निंतिं मौद्रिक नीति सार्वजनिक यानादीगु दु । न्हूगु मौद्रिक नीति कथं वइगु आर्थिक दँ निसें वाणिज्य बैंक, विकास बैंक व वित्त कम्पनी स्वंगुलिं नं ४ प्रतिशत जक अनिवार्य नगद अनुपात कायम याःसा गाइगु जूगु दु ।

थ्व व्यवस्थां वित्तीय संस्थाय् ४८ अर्ब थप तरलता दइगु व थुकिं बैंकतय् आधार दरय् कमी वइगु खँ धाःगु दु । थ्वयां न्ह्यव वाणिज्य बैंक, विकास बैंक व वित्त कम्पनीं छसिकथं ६, ५ व ४ प्रतिशत अनिवार्य नगद अनुमान कायम यायेमाःगु व्यवस्था दुगु खः ।

अथेहे पूर्वाधार परियोजनाय् दुहां वइगु विदेशी लगानीयात राष्ट्र बैंकया बिस्कं हे कोषय् जम्मा यानाः हेजिङ सुविधा उपलब्ध याकेगु व्यवस्था याइगु जूगु दु । उगु कोषं विदेशी लगानीकर्तातय्सं फयेमालीगु विदेशी विनयमया निहित जोखिम व्यवस्थापन यायेत ग्वाहालि जुइगु खँ धाःगु दु ।

थ्व सुविधां ततःधंगु जलविद्युत आयोजना, प्रसारण लाइन, सतक व मेमेगु पूर्वाधार दयेकेत वैदेशिक लगानी आकर्षित यायेफइगु खँ धाःगु दु ।अथेहे बैंक व वित्तीय संस्था बीगु ओभरड्राफ्ट लगायत रिभल्बिङ प्रक्रियाया व्यक्तिगत कर्जा सुविधा सीमा ७५ लाखं म्हो यानाः ५० लाख जक कायम याइगु जूगु दु ।

व्यक्तिया नामय् दुगु स्वंगू लाख तका तकया निक्षेप सुरक्षण व्यवस्था याइगु

शेयरया भाः २० प्रतिशत तक कुहां वंसां मार्जिन कल यायेत बाध्य मजुइगु

वाणिज्य बैंकतय्सं फुक्क प्रदेशय् प्रादेशिक कार्यालय स्थापना यायेमाःगु

अथेहे थज्याःगु ओभरड्राफ्ट प्रकृतिया त्यासा नियन्त्रण यायेत आवश्यक नीतिगत व्यवस्था यायेगु खँ नं मौद्रिक नीतिइ न्ह्यथनातःगु दु ।
मेखे शेयर लगानीकर्तातय्त अःपुकेगु निंतिं शेयर बरः तयाः बीगु मार्जिन लेन्डिङय् सुरक्षणया निंतिं तयातःगु शेयरया भाः २० प्रतिशत तक कुहां वंगु अवस्थाय् मार्जिन कल यायेत बाध्य मजुइगु व्यवस्था नं मौद्रिक नीति तःगु दु ।

अथेहे शेयर बरः तयाः बीगु त्यासाय् प्राथमिक पूँजीया २५ प्रतिशत तक जक प्रवाह यायेदइगु व्यवस्था नं मौद्रिक नीतिइ याःगु दु । थ्वयां न्ह्यव बंैकतय्सं प्राथमिक पूँजीया ४० प्रतिशत तक मार्जिन त्यासा बीदइगु व्यवस्था यानातःगु खः । अथेहे मौद्रिक नीति नवीकरणीय ऊर्जापाखें चले जुइगु सवारी साधनयात बीगु त्यासायात नं प्राथमिकता चूलाःगु त्यासाय् गणना यायेगु नीति दुथ्याकूगु दु ।

आवंलि वाणिज्य बंैक, विकास बैंक व वित्त कम्पनीं मुऽं त्यासाया ५ प्रतिशत त्यासा विपन्न वर्गय् लगानी यायेमाःगु व्यवस्था नं याःगु दु । थुकी मिस्तय्सं संचालन याइगु परियोजनाय् १५ लाख तक सामुहिक जमानीइ बिउगु त्यासायात विपन्न वर्ग कर्जाय् गणना यायेफइगु व्यवस्था नं याःगु दु ।

मिस्तय् उद्यमशीलता विकासया निंतिं सरकारं थज्याःगु त्यासाय् ६ प्रतिशत ब्याज अनुदान बीगु व्यवस्था नं याःगु दु । अथेहे मौद्रिक नीतिइ वइगु आर्थिक दँ दुने वाणिज्य बैंकतय्सं फुक्क प्रदेशय् प्रादेशिक कार्यालय स्थापना यायेमाःगु व्यवस्था नं याःगु दु । थ्व व्यवस्थां प्रदेशय् बैंकिङ सेवा सरल व प्रभावकारी जुइगु लिसं वित्तीय पहुँचय् समावेशीता विस्तार जुइगु खँ धाःगु दु ।

अथेहे व्यक्तिया नामय् तयातःगु बचत व मुद्दती खाताय् स्वंगू लाख तका तकया निक्षेप सुरक्षण व्यवस्था याइगु जूगु दु । थ्वयां न्ह्यव निगू लाख तका तकया जक सुरक्षण व्यवस्था दुगु खः ।बैंकतय्सं ताःई न्ह्यव निसें शेयर कारोवार याये दयेमाःगु माग याना वयाच्वंगुयात संवोधन यासें मौद्रिक नीतिं बैंकतय्सं धितोपत्र व्यवसाय यायेगु खःसा बिस्कं हे सहायक कम्पनी स्थापना यानाः कारोवार यायेफइगु व्यवस्था न्हूगु मौद्रिक नीतिइ दुथ्याकूगु दु ।

अथेहे तःधंगु बैंकतय् मर्जरया निंतिं थप प्रोत्साहन यायेगु खँ नं मौद्रिक नीतिइ न्ह्यथनातःगु दु । अथेहे आवंलिं बैक व वित्तीय संस्थाय् ज्या याःवःपिं कर्मचारीतय्सं निदँया दुने बैंकिङ सम्बन्धी अनिवार्य तालिम कायेमालीगु व्यवस्था नं याःगु दु ।