
तत्कालीन नेकपा माओवादीयात शान्ति प्रक्रियाय् हयेत सहजकर्ताया भूमिका म्हितादीम्ह पद्मरत्न तुलारधयात हनेगु निंतिं वंगु लछिन्ह्यवंनिसें छगू लिपा मेगु ज्याझ्वः जुया वयाच्वंगु दु । मानवअधिकार, नेपालभाषा, पत्रकारिता, साहित्य व नाटक क्षेत्रय् महत्वपूर्ण भूमिका म्हितादीम्ह तुलाधरया ज्याःजंक्वया लछियंकं ज्याझ्वःकथं थ्व हे वइगु भदौ ३० गते वय्कःयात नागरिक अभिनन्दन यायेगु मू ज्याझ्वः जू वनाच्वंगु दु ।
वंगु भदौ १६ गते वामपन्थी नेता तुलाधरया नेवाः परम्पराकथं ७७ दँ, न्हय्ला, न्हय्न्हु, न्हय्गू घडी व न्हय्पलाःया साइतय् ज्याःजंक्व यायेगु ज्या क्वचायेधुंकूगु दु । पद्मरत्न तुलाधर नागरिक अभिनन्दन समारोह समितिं भदौ १ गतेनिसें ३० गतेतक वय्कः क्रियाशील जुयादीगु व वय्कलं थीथी क्षेत्रय् बियादीगु योगदान कयाः छगू दर्जन ज्याझ्वः यानाः सम्मान व्यक्त यायेगु ज्या जुया वयाच्वंगु दु ।
थ्व झ्वलय् वइगु बुधवाः वय्कःया सम्मानय् वय्कलं साहित्यया ख्यलय् बियादीगु योगदानयात कयाः व विहीवाः नेपाल संवत्या आन्दोलनया विषययात कयाः गोष्ठि जूवनाच्वंगु दु । नागरिक अभिनन्दन समारोह समितिया अध्यक्ष लक्ष्मीदास मानन्धरं नेवाः समुदायय् ज्याःजंक्व संस्कार छगू अतिकं महत्वपूर्ण संस्कार जूगु व थ्वकुन्हु मनुखं जन्म कायेधुंकाः छगू अध्याय क्वचाःकथं काइगु धयादिल ।
नेवाः समुदायय् मचाजंक्व व ज्याःजंक्व यानाः निक्वः जंक्व यायेगु चलन दु । नेवाःभासं बुराबुरी जुइधुंकाः याइगु जंक्वयात ज्याःजंक्व (ज्याथजंक्व) धाइ । ज्याःजंक्व याइबलय् जंक्व याइपिंत रथय् तयाः थःथःगु लागाया त्वाः, जःखः व नगर परिक्रमा यायेगु प्रचलन दु । थुकथंया ज्याःजंक्व स्वक्वःतक यायेगु प्रचलन नेवाः समुदाय दुने दु ।
अभिनन्दन समारोह समितिया नायः मानन्धरं वामपन्थी नेता तुलाधरं राजनीतिक ख्यलय् बियादीगु योगदान अतिकं महत्वपूर्ण जूगु धयादिल ।वय्कलं धयादिल, ‘कांग्रेस व कम्युनिष्ट थेंज्याःगु निगू राजनीतिक शक्ति छगू हे थासय् वयेधुंकाः जक बहुदलीय व्यवस्था पुनःस्थापना याये फइगगु मान्यता तयादीम्ह तुलाधरं सर्वोच्च कमान्डर गणेशमान सिंह व उगु ईया वाममोर्चायात छगू हे थासय् हयेगु ज्या यानादीगु खः, लिपा २०४८ सालया प्रजातन्त्र हयेत नेपाली जनता सफल जुल ।’
नेपालभाषा मंकाः खलःया नेतृत्व यानादीगु इलय् भाजु तुलाधरयाके ‘नेपालभाषा पत्रिका’या सम्पादकतकं जुयाः ताःईतक पत्रकारिता यानादीगु अनुभव दु । अथे हे नेपाल संवत्यात राष्ट्रिय संवत्या मान्यता बीकेत व नेपाल संवत्या प्रणेता शंखधर साख्वाःयायत राष्ट्रिय विभूताया रुपय् घोषणा याकेत नं वय्कलं आपालं संघर्ष यानादिल ।
वय्कःया नेपालभााषया आपालं ख्यालः, च्वखँ यानाः झिंखुगू सपूm पिदनेधुंकूगु दु । नेपालय् बहुदलीय व्यवस्थाया पुनःस्थापना यायेगु अभियानय् थःगु जीवनया ताःई फ्यानादीम्ह तुलाधर २०४२ सालय् नेकपा (माले)या समर्थनय् राष्ट्रिय पंचायत सदस्यया रुपय् चुनावय् उम्मेदवार जुयादीवं चर्चाया च्वकाय् थ्यनादीगु खः ।
नेकपा एमालेया समर्थनय् २०४८ साल व वि.सं. २०५२ सालय् येँपाखें प्रतिनिधिसभाया सदस्यय् निर्वाचत जुयादीम्ह तुलाधर वि.सं. २०५३ सालय् श्रम व स्वास्थ्यमन्त्री नं जुयादीधुंकूगु दु । राष्ट्रिय पंचायतया सदस्यया निंतिं उम्मेदवार जुयादीगु इलय् उगु इलय् जनपक्षीय उम्मेदवार जुयाः सुद्र्यः चिं कयादीम्ह वय्कःया हे चुनाव चिं सुद्र्यः तत्कालीन नेकपा (एमाले) व थौंकन्हय् नेपाल कम्युनिष्ट पार्टी (नेकपां) काःगु दु ।
मानन्धरया अध्यक्षताय् ११८ सदस्यीय नागरिक अभिनन्दन मूल समारोह समिति गठन यानातःगु , गुकी जनकवि दुर्गालाल श्रेष्ठ, अधिकारकर्मि मल्ल के. सुन्दर, गणेश साय्मि नरेशवीर शाक्य आदि दुथ्याःगु निर्देशक समिति गठन यानातःगु दु ।
LEAVE YOUR COMMENTS