अमेरिकाय् तिबः संकिपाया शुटिंग

येँ(नेपालभाषा टाइम्स)- निर्माणाधीन नेपालभाषाया संकिपा ‘तिबः द सपोर्ट ’या छुं छुं ब्वया शुटिंग अमेरिकाय् शुरु जूगु दु । अमेरिकाया मेरिल्याण्डया गोथेसवर्गय् संकिपाया शुटिंग जुयाच्वंगु निर्माण पक्षं जानकारी बिउगु दु ।

अमेरिकाया शुटिंगया भाला ‘द हिमालय भाइब्स’ नांया नेपाःमि पुचलं काःगु खः । अमेरिकाय् जुयाच्वंगु शुटिंग छाँयाकन निर्देशन रोशन श्रेष्ठं याना च्वनादीगु दु । संकिपाया बाखनय् अमेरिकाय् च्वनाच्वंपिं पात्रया नं भूमिका दुगुलिं उखे हे शुटिंग याःगु खः ।

अमेरिकाय् जुयाच्वंगु शुटिंगय् दिवाकर धौभडेल, जिम श्रेष्ठ, मिला श्रेष्ठ, रवि शाक्य लगायतं अभिनय यानादीगु दु । संकिपाया निंतिं आवश्यक व्यवस्थापनया भाला जयम्बु रंजित, अनुप जोशी व मिला अमात्यया पुचलं कयातःगु संकिपाया निर्देशक रवि सायमिं कनादिल ।

नांजाःगु ऐतिहासिक संकिपा जामनः गुभाजु’ निर्माण याःगु वाइल्ड बुल्सया निंतिं सर्जु रंजित व समिता रंजितं निर्माण यानादीगु संकिपाया नेपालय् जुयाच्वंगु शुटिंग ६० प्रतिशत स्वयां अप्वः सिधयेधुंकूगु निर्देशक साय्मिं कनादिल ।

आशाकाजी थकु, सुशील राजोपाध्याय, संघरत्न शाक्य, पुष्कर माथेमा, सरस्वति मानन्धरलिसें आपालं कलाकारया भूमिका दुगु संकिपाया बाखं ओमशंकर श्रेष्ठ च्वयादीगु खःसा नेपालय् छाँयाकनं अमर चित्रकारं याना वयाच्वनादीगु दु ।