न्हापांम्ह मिसा न्यायाधीश सिलु सिंह मन्त

येँ – सर्वोच्च अदालतया न्हापांम्ह मिसा न्यायाधीश मयजु सिलु सिंह म्हिगः मन्त । वंगु छवाः न्ह्यः आकाझाकां ‘ब्रेन एटेक’ जुयाः वयकःयात मेडिसिटी अस्पतालय् वासः याकातःगु खः । अस्पताल भर्ना यासांनिसें वयकः अचेत जुयाच्वंगु खःसा म्हिगः अचेत अवस्थां तुं हे वयकः मदुगु खँ छेँजःपिंसं धाःगु दु ।

वयकः ८४ दँ दुम्ह खः । मयजु सिंह नांजाःम्ह वाम बुद्धिजीवी एवं समालोचक प्रो. माणिकलाल श्रेष्ठया जहान लिसें नेपालभाषाया न्हापांगु न्हिपौ ‘नेपालभाषा पत्रिका’ या सम्पादक-प्रकाशक फत्तेबहादुर सिंहया म्ह्याय् खः ।

मदुम्ह सिलु सिंहं छगू इलय् अल इण्डिया रेडियोय् नेपालभाषां समाचार वाचन यायेगु ज्या नं यानादीगु खःसा नेपालभाषा पत्रिकाय् गबलें गबलें नेवाः भासं च्वयेगु ज्या नं यानादीगु खः । वयकः नेपाल बार एशोसियसनया पुलांम्ह उपसभापति नं खः ।

वयकःया जहान प्रो. माणिकलाल श्रेष्ठयात नं थौंकन्हय् मेडिसिटी अस्पतालया आईसीयु वार्डय् भर्ना यानातःगु दु ।

मयजु सिंहया निम्ह कायपिं दी । तःधीम्ह काय थौंकन्हय् जर्मनीइ दी । तःधीम्ह काय नेपाः लिहां वयेकाः जक अन्तिम संस्कार यायेगु खँ दुसां थौंकन्हय् लकडाउनया कारणं विश्वन्यंकंया हवाई उडान बन्द जुयाच्वंगुलिं वयकः नेपाः लिहां वयेत थाकुयाच्वंगु खँ सीदुगु दु ।