राष्ट्रप्रमुखपाखें श्री कुमारी, श्री गणेश व श्री भैरवया संकल्प पुजा

येँ- जुजु जयप्रकाश मल्लया पालंनिसें प्रचलन शुरूयाःगु जीवित द्योःपिं मध्य मुलरूपं येँयाः पुन्हि कुन्हु पुज्याइपिं श्री कुमारी, श्री गणेश व श्री भैरवया राष्ट्रप्रमुखपाखें संकल्प पुजा यात । संकल्प पुजा क्वचाये धुंकाः गणेश व भैरवयात बसन्तपुरया कुमारी छेँय् बिज्याकाः स्वम्हं जीवित द्यःपिनिगु पुजा कुमारी छेँय् याःगु खः ।

श्री गणेश (संवेग शाक्य) व श्री भैरव (रुजन शाक्य) यात समय परिस्थिति व बर्षया कारण युवा अवस्थाय् थ्यंगुलिं नियमकथं वसपोलपिंत बिदा यानाः न्हूम्ह गणेश व भैरव ल्ययेत शाक्यतय्गु १६गू विहारय् सूचं छ्वयाः शाक्य कुलपुत्रपिनिगु निवेदन व जातःया आधारलिसें पञ्चांग निर्णायक समितिया सिफारिस कथं देय्याा अवस्थालिसे ज्वःलाःगु गुणदोष, लक्षण व नक्षत्रया आधारय् भाष्कर देव संस्कारीत केशचन्द्र कृत पारावर्त महाविहार इतुंबहाःया शाक्य कुलपुत्र रोदिन शाक्ययात श्री गणेशया रूपय् वि सं २०७७ पौष ३ गते प्रतिस्थापन याःगु खः।

उकथं हे श्री भैरवया रुपय् कीर्तिपूण्य महाविहार क्वहिति बहाःया शाक्य कुलपुत्र कर्सनव शाक्ययात वि सं २०७७ पौष ४ गते विधिवत रुपं नव प्रतिस्थापित याःगु खः ।

शाक्य महाविहार संघ येँया ग्वसालय् जूगु थुगु संकल्प पूजाया लसताय् आमन्त्रित सकलसित भ्वय् नं नकूगु खः ।