ने. सं. ११४४ कौलाथ्व तृतीया -

भिमफेदी–कुलेखानी सुरुङ मार्ग प्रदेशं दयेकीगु

येँ – भिमफेदी कुलेखानी सुरुङ मार्ग प्रदेश सरकारं दयेकीगु जूगु दु । प्रदेश नम्बर ३ या मुख्यमन्त्री डोरमणि पौडेलं उगु खँ धयादीगु खः ।
वय्कलं सन् २०१२ सं उगु सुरुङमार्ग प्यदँया दुने दयेकेगु धकाः नेपाल पूर्वाधार विकास कम्पनीं सरकार लिसे सम्झौता याःसां नं आः तक गुगुं नं कथंया ज्या मयाःगुलिं आः प्रदेश सरकारं हे दयेकेगु खँ स्पष्ट यानादीगु दु ।

मुख्यमन्त्री पौडेलं प्रदेश सरकारं सुरुङमार्गया विस्तृत परियोजना प्रतिवेदन दयेकेत ५ करोड तकाया बजेट फ्यानागु जानकारी बियादिसें प्रदेशया गौरवया आयोजनाया परियोजना अन्तर्गत तयाः बिस्कं महत्व बियाः दयेकेगु ज्या न्ह्याकेगु खँ कनादिल ।

प्रदेश सरकार लिसे २०७१ सालंनिसें सम्झौता याःगु नेपाल पूर्वाधार विकास कम्पनी लिमिटेडं क्वःछिनातःगु गुगुं नं ज्या मन्ह्याकूगुलिं उगु सम्झौता खारेज यायेत प्रदेश सरकारपाखें निर्णय जुयाः केन्द्र सरकारयात इनाप यायेधुनागु जानकारी नं पौडेलं बियादिल ।

पूर्वाधार विकास कम्पनीं नेपाल सरकारलिसे २०२२ तक ई थप यानाः काःगु खःसां नं आः उगु कम्पनीं छुं ज्या यायेमफइगु स्पष्ट जूगुलिं सम्झौता खारेजीया निंतिं केन्द्र सरकारलिसें प्रदेश सरकारं इनाप याःगु दु ।

आः तक कम्पनीं छुं ज्या मयाःगु धासें पौडेलं धयादी, ‘आः कम्पनीं छुं याइ धयागु आश मदु, खर्बौ ध्यबया व्यक्तिया कम्पनीइ सरकारं जमानी च्वनाः ज्या याके फइमखु, तर झीत उगु लँपु न्ह्याथें यानाःसां दयेकेमाःगु दु, उकिया जिम्मा प्रदेश सरकारं थम्हं हे काइ ।’

सर्वसाधारण जनतां सुरुङमार्ग दयेकेगु निंतिं लाखौं तक ध्यबा कम्पनीयात लःल्हाःगु व आः जनतां उगु ध्यबा ग्वः धकाः मालेमाःगु अवस्थ वःगु खँ नं मुख्यमन्त्री पौडेलं धयादीगु दु ।