नेपाः व चीन सम्झौता बारे अमेरिकाया न्ह्यसः
येँ -चिनियाँ राष्ट्रपति सी जिनपिङं थगुने याःगु नेपाः भ्रमणया इलय् नेपाः व चीन दथुइ जूगु सम्झौता बारे अमेरिकां न्ह्यसः थना हःगु दु । संयुक्त राष्ट्रसंघीय मानव अधिकार परिषद्या बैठकय् अमेरिकां उगु न्ह्यसः न्यनेगु धकाः नेपाःयात न्ह्यव जानकारी बियाहःगु खः ।
अमेरिकां छ्वयाहःगु थ्व न्ह्यसःयात कयाः परिषद्या स्वक्वःगु बैठकय् सहलह जुइगु खँ धाःगु दु । उगु बैठकय् नेपाःपाखें परराष्ट्रमन्त्री प्रदिप ज्ञवालीं सम्बोधन याइगु ज्याझ्वः दु । बैठकय् सछिगू स्वयां अप्वः देय्या प्रतिनिधितय्सं सम्बोधन याइ ।
अमेरिकां नेपाःयात चीनलिसे जूगु सीमा व्यवस्थापन प्रणाली, पारस्परिक कानुनी सहायता सम्झौता व चीनलिसे यायेत्यंगु सुपुर्दगी सन्धिया लिपांगु अवस्था बारे नं न्ह्यसः न्यना हःगु खँ सीदुगु दु ।
चिनियाँ राष्ट्रपति सी जिनपिङया नेपाः भ्रमणया इलय् सीमा व्यवस्थापन प्रणाली व कानुनी सहायताया बारे सहमति जूगु खःसा सुपुर्दगी सन्धिया बारे धाःसा सहमति जुइ मफुगु खः । चीनलिसे जुइगु उगु सुपुर्दगी सन्धि नेपालय् च्वनाच्वंपिं तिब्बती शरणार्थीतप्रति लक्षित जूगु जुइफु धासें अमेरिकां चिउताः प्वंकूगु खः ।
उकथं हे अमेरिका नेपालय् च्वनाच्वंपिं तिब्बती शरणार्थीया अवस्था बारे न्ह्यसः तसेंं अमेरिकां न्यनातःगु दु, ‘शरणार्थी दर्ता यायेगु व उमिगु भेरिफाइ यायेगु बारे नेपाः सरकारया योजना छु दु ?’
अमेरिकां नेपाःया संक्रमणकालीन न्याय प्रणालीयात कयाः नं न्ह्यसः थंगु दु । अमेरिकां नेपाःया संक्रमणकालीन न्याय अझ नं अन्तर्राष्ट्रिय मापदण्ड कथं मजूगुनिगु द्वपं बियाच्वंगु दुसा उकथं हे मिडिया काउन्सिल विधेयक, सूचना प्रविधि सम्बन्धी विधेयक व आम सञ्चार कानुन विधेयकया बारे नं न्ह्यसः थंगु दु । नेपाः सरकारं हःगु आम सञ्चार सम्बन्धी विधेयकयात नेपाःया सञ्चारकर्मी व नागरिक समाजं विरोध याःगु कारणं सरकारं उकियात स्थगनय् तःगु खः ।
उकथं हे बेलायत व आयरल्याण्डं नं नेपाःया थीथी विषययात कयाः थीथी न्ह्यसः न्यनाहःगु खँ सीदुगु दु । बेलायत व आयरल्याण्डं धार्मिक स्वतन्त्रताया विषयय् न्ह्यसः न्यंगु खः । उकथं हे बेलायत नं संक्रमणकालीन न्यायया विषययात कयाः नेपाःयाके न्ह्यसः न्यंगु दुसा बेल्जियमं नं न्ह्यसः न्यंगु दु । मानव अधिकार परिषद्या बैठकय् नेपाःया मानव अधिकार बारे सहलह जुइगु खँ धाःगु दु ।
LEAVE YOUR COMMENTS