मजदुरतय् तलब १५ हजार थ्यनीगु

येँ –  मजदुरतय् तलब लय् २० हजार थ्यंकेमाःगु माग मजदुर संगठनं यानाच्वंसां उद्योगीतय्सं उलिमछि तलब अप्वयेके मफइगु खँ धाःगु दु । न्हापा मजदुरतय् न्युनतम तलब ९ हजार ७ सय तका क्वःछिनातःगु खः । आः उमिसं २० हजार तका थ्यंकेमाःगु माग यानाच्वंगु दु ।
उद्योगीतय्सं मूल्यवृद्धिया आधारय् १२ प्रतिशत तक जक अप्वयेके फइगु खँ धाःगु दु ।

१२ प्रतिशत अप्वयेकेबलय् लछिया तलब १० हजार ८६४ तका जुइ । वइगु साउन १ गते निसें मजदुरतय् तलब अप्वयेके माःगुलिं आः मजदुर व उद्योगीतय् दथुइ न्युनतम पारिश्रमिकयात कयाः सहलह जुयाच्वंगु दु । मजदुरतय्सं फयांफछि अप्वः तलब माः धकाः धायेगु यानाच्वंगु दुसा उद्योगीतय्सं नं म्हो जक तलब बढे यायेगु कथं तयारी यानाच्वंगु दु ।

सरकारं निदँय् छकः मजदुरतय् तलब समायोजन यायेगु व्यवस्था यानातः कथं न्युनतम पारिश्रमिक समिति नीस्वनातःगु खः । समितिं म्होतिं १५ हजार तकाय् सहमति जुइफइगु सम्भावना दुगु खँ धाःगु दु । वइगु छवाःया दुने सहमति कायम यायेमाःगु दबाब मजदुर व उद्योगीयात दु । सहमति कायम यायेगु निंतिं समितिया बैठक निरन्तर च्वनाच्वंगु दु ।

सामाजिक सुरक्षाय् औपचारिक क्षेत्रया २० प्रतिशत व अनौपचारिक क्षेत्रय् ४१.५ प्रतिशत अप्वइगु सम्भावना दु । समितिया निर्णय लिपा श्रम मन्त्रालयं साउन १ गते निसें न्हूगु न्यूनतलम तलब लागू याइगु खँ धाःगु दु ।

सम्बन्धित बुखँ

LEAVE YOUR COMMENTS