चीनयाके ग्वाहालिया निंतिं महाथिरया इनाप

मलेसियाया प्रधानमन्त्री महाथिर मोहम्मदं आर्थिक समस्याय् तक्यनाच्वंगु मलेसियायात ग्वाहालि यायेत चीनयात इनाप यानादीगु दु । थुकिया लिसें मलेसियाया पुलांगु सरकारं सम्झौता यानातःगु गुलिखे चिनिया ग्वाहालिया तःधंगु परियोजना परिमार्जन यायेत नं इनाप यानादीगु दु ।

चीनया औपचारिक भ्रमणय् वनाच्वंम्ह ९३ दँया प्रधानमन्त्री महाथिरं पुलांम्ह प्रधानमन्त्री नजीब रजाकं चिनियाँ राज्य प्रवर्धन यानातःगु परियोजना स्वीकृत यायेत तःधंगु आर्थिक हिनामिना याःगु व मलेसियाया आर्थिक परिस्थितियात दाउलय् लाकूगु द्वपं बिया वयाच्वंगु दु ।

महाथिर सरकारं चिनिया ग्वाहालिं संचालित २२ अर्ब डलर स्वयां अप्वःया परियोजना निलम्बन यानादीगु दु, गुकी छगू प्रमुख रेल सेवा निर्माण यायेगु नं लाः । महाथिरं थःगु न्यान्हुयंकंया चीन भ्रमणया इलय् अन्यायपूर्ण रुपं जूगु सम्झौतायात कयाः चीनलिसे औपचारिक खँ ल्हायेगु प्रतिबद्धता प्वंकादीगु दु ।