रुसया ७५ प्रतिशत सैनिक युक्रेनय्, राजधानी किभया वासिन्दा त्रासय्

एजेन्सी- रुसं ७५ प्रतिशत सैनिक युक्रेनय् तैनाथ याःगु बेलायतया सैनिक एकेडेमीं दाबी याःगु दु । रुसं युक्रेनय् न्हापा दुपिं ४० प्रतिशत सेनायात ७५ प्रतिशत थ्यंकूगु खः । बेलायतया रोयल युनाइटेड सर्भिस इन्स्टियुटया अनुसन्धानकर्ता डा. ज्याक वाट्लिङ्गं रुसं थःगु तीन चौथाइ सेना युक्रेनय् तैनाथ याःगु खँ धाःगु खः ।

युक्रेनया राजधानी किभया वासिन्दा त्रसित जुयाच्वंगु बिबिसिं धाःगु दु । सञ्चार माध्मयय् करिब ६५ किलोमिटर ताहाकः झ्वः छुनाः रुसी सेना राजधानी किभपाखे वयाच्वंगु समाचार वःगु दु । सोमवाः स्याटेलाइटं काःगु किपाय् बेलारुसया सिमाना किभपाखें रुसी सेना वयाच्वंगु खनेदुगु खः । युक्रेनया उत्तर पूर्वी शहर ओख्तिर्काय् ७० म्ह युक्रेनी सैनिक सीगु नं स्थानीय अधिकारीतय्सं धाःगु दु । दक्षिण युक्रेनय् च्वंगु शहर खेरनासय् नं रुसी सेनां घेरे याःगु दु । खारकिभं नं हमला जुयाच्वंगु अन्तर्राष्ट्रिय सञ्चार माध्यमतय्सं धाःगु दु । खारकिभं गोलीबारीनिसें मिसाइल आक्रमण तक जुयाच्वंगु दु । आक्रमणय् गुम्ह स्थानीय मनूत सीगु बिबिसिं धाःगु दु ।

युक्रेनया राष्ट्रपति भोलोदेमिर जेलेन्स्कीं थुकियात युद्ध अपराध धाःगु दु । युक्रेनय् रुसी सेना दुहां वये धुकाः ३५२ म्ह नागरिक सीधुंकूगु दु । अथेहे न्यागू लाख सिबें अप्वः मनूत मेगु देसय् शरण काःवने धुंकूगु दु ।

मेखे रुस व युक्रेन दथुइ बेलारुसया सीमानाय् जूगु शान्तिवार्ता निष्कर्षविहिन जूगु दु । थ्वहे दथुइ रुसयात थीथी प्रतिबन्ध तयेगु ज्या नं जुयाच्वंगु दु । थ्व हे झ्वलय् फिफा व युइएफएं रुसया फुटबल गतिविधिइ प्रतिबन्ध तःगु दु । रुसया अन्तर्राष्ट्रिय टिम व दक्व क्लबयात प्रतिबन्ध तयागु फिफा व युइएफएं जानकारी बिउगु दु । आइतवाः फिफां रुसी ध्वाँय् व राष्ट्रिय गानयात जक प्रतिबन्ध तःगु खःसा उकिया आलोचना जूगुलिं फुटबल टिमयात हे प्रतिबन्ध तःगु खः ।