खानं प्रधानमन्त्रीया शपथ ग्रहण यात

पाकिस्तानया न्हूम्ह प्रधानमन्त्री कथं इमरान खानं शनिवाः शपथ ग्रहण यानादीगु दु । तेहरिक ए इन्साफ (पीटीआई)या नेता खान पाकिस्तानया २२ औं प्रधानमन्त्री जुयादीगु खः । शुक्रवाः प्रतिनिधि सभाय् जूगु निर्वाचनय् खानं १७ट मत कयाः प्रधानमन्त्री जुयादीगु खः । प्रधानमन्त्री जुइत मुक्कं १७२ मत आवश्यक दुगु खः ।

प्रधानमन्त्री जुइ निंतिं पाकिस्तान मुस्लिम लिगया शाहबाज सरिफ खानया प्रतिद्वन्द्वः कथं दनादीगु खः ।पाकिस्तान क्रिकेटया पुलांम्ह कप्तान खानया पार्टी पिटिआई नं वंगु जुलाई २५ य् जूगु आम निर्वाचन ११४ थासय् विजय चूलाकूगु खः । दकलय् तःधंगु पार्टीया ल्याखं खान उबलय् हे प्रधानमन्त्री जुइगु पक्का धयाथें जूगु खः ।

सरकार गठन यायेत आवश्यक बहुमत मदुसां दकलय् तःधंगु पार्टीया ल्याखं प्रधानमन्त्री जुयाः गठबन्धन सरकार दयेकूगु खः । खानं थःगु मन्त्रिपरिषद १५ निसें २० सदस्यीय जक दयेकेगु प्रतिबद्धता प्वंकादीगु दु । प्रधानमन्त्रीं शपथ ग्रहण यायेवं क्रिकेटया विश्वविजेता टिमया कप्तान खानं थःम्हं भ्रष्टाचार विरोधी अभियान न्ह्याकेगु प्रतिबद्धता नं प्वंकादीगु दु ।