बंगलादेशय् डुंगाय् मिं नयाः ३६ म्ह सीत

एजेन्सी- बंगलादेशय् छगः यात्रु ज्वना वनाच्वंगु डुंगाय् मि नयेवं म्होतिं नं स्वीखुम्हेसिया ज्यान वंगु दु । थनया सुगन्धा खुसिइ न्ह्याः वनाच्वंगु डुंगाय् मि चयाःगु खः ।

घटना जूगु झालकोटी जिल्लाया प्रहरी उपरीक्षक मोइनुल हकं बिबिसी बंगलादेशलिसे खँ ल्हासें शुक्रवाः सनिल तकया दुने ३६ म्हेसिया सीम्ह लुइधुंकूगु व मेपिनिगु नं सीम्ह लुइफुगु खँ धाःगु दु ।

स्वतँ जाःगु डुंगाय् मि च्यायेवं गुलिखे मनूतय्सं खुसिं तिंन्हूगु खः । खुसिइ तिंन्हुपिं मध्ये नं गुलिखे मनूत लखय् दुनाः सीगु खँ धाःगु दु ।
उगु डुंगाय् न्यासःम्हं मल्याक यात्रुत दुगु खः । एमभी अभियान नांया थ्व डुंगा बिहिवाः चान्हय् ढाकां बर्गुनापाखे वनाच्वंगु इलय् थ्व घटना जूगु खः । शुक्रवाः सुथ न्हापनं डुंगाय् मि च्याःगु खःसा छु कारणं मि च्याःगु धयागु धाःसा सीकेमफुनि ।

बंगलादेशय् डुंगाया सुरक्षाया निंतिं ध्यान मबीगु व सुरक्षा मापदण्ड बेवास्ता याइगु लिसें क्षमता स्वयां अप्वः यात्रु कुबिइगुलिं यानाः इलय् ब्यलय् डुंगा दुर्घटनाया घटना जुइगु याः ।

दुर्घटना जूगु डुंगाय् यात्रा यानाच्वंपिंसं धाःकथं यात्रा न्ह्याः न्ह्यः हे डुंगा सामान्य स्वयां क्वानाच्वंगु अनुभव याःगु खः । यात्रुतय्सं धायेवं डुंगाया कर्मचारीतय्सं कार्पेट लानाबिउगु खःसा लिपा क्वाःगु अप्वया वनाः मि हे च्याःगु खः ।

सम्बन्धित बुखँ

LEAVE YOUR COMMENTS