विश्वन्यंक ४४०० उडान रद्द, अमेरिकाय् जक २५००

एजेन्सी- कोरोनाभाइरस व खराब मौसमया कारणं विश्वन्यकं शनिवाः छन्हुं थ्यंमथ्यं ४४०० गू उडान रद्द जूगु दु । अमेरिकाय् च्वंगु एयर ट्राफिक साइट फ्लाइट अवेरं बिउगु जानकारीकथं अमेरिकाय् जक २५०० सिबें अप्वः उडान रद्द जूगु दु । क्रिसमसया इलय् अमेरिकाय् हवाइ उडान रद्द जुइगु क्रम उच्च विन्दुइ थ्यनाच्वंगु दु ।

एयरलाइन्सय् ज्या यानाच्वंपिं कर्मचारीत कोरोना संक्रमित जुयाच्वंगुलिं यानाः अप्वः धयाथे कर्मचारी क्वारिन्टेनय् लानाच्वंगुलिं नं समस्या तच्वःगु खः । अथे हे मध्य अमेरिकाय् जुयाच्वंगु हिमपातं नं यात्रुतय्त थप समस्या जूगु दु । अमेरिकाय् रद्द जूगु द्वःछिसिबें अप्वः उडान सिकागो व मिडवेलय् जूगु खः । उडान रद्द जूगुलिं युनाइटेड एयरलाइन्सं छगू विज्ञप्ति पिकयाः उडान रद्दया कारण कर्मचारीतय्त ओमिक्रोनं असर लाःगु व खराब मौसम जूगु धाःगु दु ।

आइतवाः तक क्रिसमसया बिदा सिधेयेकाः मनूत थःपिनि छेँय् लिथ्यनेमाःगु खःसां यात्रुत विमानस्थलय् अलपत्र लानाच्वंगु दु । एयरलाइन्सतय्सं कर्मचारीया अभाव जूगुलिं दुपिं कर्मचारीतय्त थप ध्याबा बियाः ज्या याकेत स्वायच्वंगु दु, तर कर्मचारी युनियनं कोरोना संक्रमण व तंचायाच्वंपिं यात्रुतय् न्ह्यने वनेत कर्र्मचारीत ग्यानाच्वंगु धाःगु दु ।

अमेरिकाय् न्हियान्हिथं कोरोनाया संक्रमण अप्वयाच्वंगु दु । न्यूयोर्कय् च्वंपिं अप्वसिनं खोप कायेधुुंकूसां संक्रमण म्हो जूगु मदुनि । अस्पतालय् नं बुलुहुँ संक्रमिततय् चाप अप्वया वनाच्वंगु दु ।

सम्बन्धित बुखँ

LEAVE YOUR COMMENTS