लेबनानया प्रधानमन्त्रीपाखें राजीनामा

एजेन्सी – वंगु मंगलवाः निसःम्हं मल्याक मनूतय् ज्यान वंक बेरुतय् जूगु रासायनिक विस्फोट लिपा लेबनानय् जनआक्रोस तच्वया वनाच्वंगु दुसा थ्व हे दथुइ प्रधानमन्त्री हसन दियाबं राजीनामा बियादीगु दु। प्रधानमन्त्री दीयाबं राष्ट्रिय टेलिभिजन पाखें राष्ट्रया नामय् सम्बोधन यासें पदत्यागु यायेगु घोषणा यानादीगु खः ।

थ्व विस्फोट लिपा लबनानी जनता सरकार भ्रष्टाचारी जूगु व असक्षम जूगु द्वपं बिसें सतकय् कुहां वःगु खः । लगातार स्वन्हु तक प्रदर्शन जुइवं प्रधानमन्त्रीं राजीनामा बियादीगु खः । वर्षौं न्ह्यवनिसें बेरुतया बन्दरगाहय् असुरक्षित रुपं तयातःगु २७५० टन अमोनीअम नाइट्रेटया कारणं थ्व विस्फोट जूगु खः ।

प्रधानमन्त्रीं दीयाबं थःगु सम्बोधनया झ्वलय् धयादीगु दु, ‘थौं झीसं न्हय्दँ न्ह्यवनिसें सुचुकातःगु थ्व दुर्घटनाया कारणया दोषीतय्त जवाफदेही दयेकेगु माग जनताया चाहनायात अनुसरण याये व उमिसं वास्तविक परिवर्तनया इच्छाया पलना याये ।’

लेबनानया राष्ट्रपति मिसेल आउनं न्हूगु सरकार गठन मजूतले कामचलाउ सरकारया रुपय् आःया सरकारयात हे जिम्मेवारी बिउगु दु। वंगु मंगलवाः विस्फोट जूगु थ्व रसायनया कारणं २२० म्हेसिया ज्यान वनेधुंकूगु दुसा अझं ११० म्ह तनाच्वंगु दु। थुकी अप्वः धयाथें विदेशी कर्मचारी व ट्रक चालकत लाःगु दु। घटनाय् लानाः थ्यंमथ्यं खुद्वः मनूत घाःपाः जूगु दु। थ्व घटनां लेबनानया राजधानी बेरुतय् म्होतिं नं स्वंगू अर्ब डलरया नोक्सान जूगु अनुमान यानातःगु दु। लेबनानया अर्थतन्त्रय् थुकिं १५ अर्ब डलरया नोक्सानी जुइगु अनुमान नं यानातःगु दु ।