सु जुइगु खः नेवाः सुपर स्टार ?

थौंकन्हय् नेवाः फिल्मया ख्यलय् सुपरस्टार धइगु खँग्वः तसकं बय्बय् जुयाच्वंगु दु । नेवाः फिल्म ख्यलय् ज्याः याना वया च्वंम्ह छम्ह कलाकारयात दछिइ छक्वः सुपरस्टार धकाः सिरपा लःल्हायेगु खँ पिहां वसांनिसें थ्व सुपरस्टार खँग्वः चर्चाया विषय जुया वयाच्वंगु दु । सुपरस्टार धइगु खँग्व वा थुकियात पदवी धायेगु खःसा थ्व पदवी धइगु चानचुने मखु । संसारय् गनं नं थथे सुपरस्टार धकाः पदवी हे लःल्हायेगु चलन मदु । थ्व ला छम्ह तसकं लोकंह्वाःम्ह कलाकारयात स्वकुमिं सुपरस्टार धकाः नालाकाइगुया चिं खः ।

बलिउडय् न्हापांम्ह सुपरस्टारया रुपय् राजेश खन्नाया उदय जूगु खः । खय्त ला राजेश खन्नासिबें न्ह्यः नं अन दिलिप कुमार, राज कपुर व देव आनन्द अनं लिपा शम्मी कपुर, राजेन्द्र कुमार, शशी कपुर थेंज्याःपिं तसकं तसकं लोकंह्वाःपिं स्टारत मदुगु मखु । उमित अन बिस्कं हे कथं नां बियातःगु खनेदु । राजेन्द्र कुमारयात जुब्ली कुमार अले दिलिप कुमारयात ट्रेजिडि किङ्ग, मीना कुमारीयात ट्रेजिडी क्वीन, हेमा मालिनीयात ड्रिम गर्ल व सायरा बानोयात ब्युटी क्वीन धकाः धाइगुयात थुकिया दसु कथं कायेजिउ । अले छक्वः छगू नामं म्हसीके धुंकाः उगु नां वा पदवी लिपा मेपिं कलाकारपिंत बिउगु खने नं मदु । सुपरस्टार धइम्ह छगु कालय् छम्ह जक वइ । राजेश खन्नाया कालय् लिपा वनाः अमिताभ बच्चन थेंज्याःम्ह सुनां ध्वये मफुम्ह स्टार पिहां वल । तर वयात सुपरस्टार धकाः मधाः ।

स्वम्ह सुपर खानया नामं बय्बय् जूपिं आमिर खान, सलमान खान व शाहरुख खान गुलि लोकंह्वाः धकाः थन धयाच्वने माली मखु, तर इपिं मध्ये सुयातं सुपर स्टार धकाः मधाः ।

नेपालभाषाया फिल्म ख्यलय् आः वया ददिइ छम्ह (मखु निम्ह) सुपरस्टारया घोषणा याइगु जूगु दु । व नं मिजंम्ह छम्ह, मिसाम्ह छम्ह । थ्व विषययात कयाः वंगु वालय् नेपालभाषाया फिल्म ख्यलय् सक्रिय जुयाच्वंपिं फिल्मकःमि दथुइ छगू सहलह मुँज्या जुल । उगु मुँज्याय् ग्वसाः खलः नेपाः सुपरस्टार फाउण्डेशनपाखें पित बिउगु अवधारणा पत्रय् पिहां वःगु छुं छुं खँ थन न्ह्यब्वयेगु कुतः याये ।

आर्यम नकःमि
जितः ला थ्व नेवाः सुपरस्टार धकाः सम्मान यायेत्यंगु तसकं हे पाय्छि थें ताः । ई हिलावंलिसे झीगु नेवाः फिल्म ख्यलय् नं हिउपाः वयेमाः । थ्व सुपरस्टार सिरपाः नं अज्याःगु हे छगू हिउपाःया रुपय् जिं कया । बरु मिजं कलाकार व मिसा कलाकार छम्ह छम्ह जक मधासे थ्व ख्यलय् जीवन पानादीपिं निर्देशक, संगीतकःमि, प्राविधिक व मेमेगु विधाया फिल्मकःमिपिंत थ्व हनाय् दुथ्याके माःथें च्वँ ।

आशाकाजी थकू
थ्व सुपरस्टार धइगु खँग्वः गय्थें गय्थें ताः । उकिं थुकिया नां मेगु हे तःसा बांलाइ । न्ह्याःगुसां थौं थन नेवाः फिल्मख्यःया आपालंआपाः फिल्मकःमि मुंगु खँ हे झीगु निंतिं लसताया खँ जुइ धुंकल । थज्याःगु लसता सदांसदां हने दयेमा । उकिं जिं स्वयेबलय् झी फिल्मकःमि सकलें मुनाः छगू पिकनिक निं यायेमाः थें च्वं ।

हिसिला महर्जन
जिं उलि बांलाक ला मसिउ । तर जिं स्वयेबलय् थ्व सुपरस्टार धइगुु फिल्मय् मेन रोल म्हितीम्ह कलाकारयात जक धाइथें च्वं । अले सुपरस्टार ल्ययेत पब्लिकपाखें भोटिङ्ग याकेगु धइगु नं पाय्छि मखु थें च्वं ।

हृदयप्रसाद मिश्र
सिरपाःया नां बांलाः । थ्व नामं नेवाः कलाकारत नं सुपरस्टारतक जुइ बहः जुल धइगु क्यँ । जिं स्वयेबलय् थुकि कलाकार जक मखसे छगू दँय् कलाकार अले मेगु दँय् प्राविधिक अले हाकनं मेगु दँय् संगीतकःमियात थुकथं सुपरस्टार धकाः घोषणा यायेगु पाय्छी जुइ ।

सुरजबीर बज्राचार्य
ग्वसाः खलकं थ्व सिरपाःया निंतिं कलाकार थःम्हेसिनं हे दरखास्त तयेमाःगु खँ पित हयातःगु दु । थ्व ठीक मखु । छम्ह कलाकार धइम्ह सृजनशील प्राणी खः । अज्याःम्ह प्राणीं जितः सिरपाः हिँ धकाः दरखास्त तः जुइमखु ।

रामकृष्ण खड्गी
सुुपरस्टार धइगु तसकं “वेट” दुगु खँग्वः खः । थथे सुपरस्टार जुइदःसा जि हे जिउ । उकिसनं छगू लाख तकाया सिरपा धइगु नं म्हो मखु । तर थन नेवाः फिल्म ख्यःया थःगु पलाः हे क्वातुइ मफुनिबलय् सुपरस्टार धकाः सुयात ल्ययेगु ले । अले थन उलि वेट दुम्ह कलाकार सु दु ले ?

नगीना जोशी
सुपरस्टार धइगु चानचुन खँ मखु । छक्वः सुपरस्टार जुइधुंकूम्ह कलाकारया जीवन शैली गज्याःगु जुइ ले । कन्हय् असनय् वनाः तरकारी न्या वनेबलय् गथे यानाः वनेगु ले । छक्वः सुपरस्टार धकाः धाःगु भरय् जीवन हनेत अःपुइगु खः ला ले ? थुखेपाखे छक्वः नं बिचाः यायेमा ।

सुरज व्यञ्जनकार
सुपरस्टार धइगु तसकं तःधंगु पदवी थेंज्याःगु खँ पिहां वयाच्वंगु दु । उकिं जिं स्वयेबलय् नेवाः स्टार धकाः जक धाःसा बांलाइ थें च्वं । सिरपाः वा सम्मानया नां न्ह्यागु हे जूसां नेवाः कलाकारिता ख्यःयात थपु याइकथंया जुइमा । सकलें कलाकःमिपिं छथाय् हे च्वनाः लसंहने फयेमा ।

पवन जोशी
थ्व थःगु म्हसीका ब्वयेगु ह्वताः ख । बरु थ्व दँय्दसं बिया यंके फयेमाः । अले पासापिंसं धाःथें तुं थुकी कलाकारयात जक दुथ्याकेगु मयासे संकिपा ख्यःया मेमेगु विधाया फिल्मकःमिपिंत नं दुथ्याका यंकेमा ।

भोगेन्द्र मानन्धर
सुपरस्टार ल्यय् निंतिं नोमिनेशन पिकानाः पब्लिक भोटिंग याकेगु धाःगु खँ पाय्छि मजू । अले दँय्दसं अतःगाना विधाः हिलाःहिलाः थ्व सिरपा बीगु धाःगु नं ठीक मखु । थ्व मुक्कं मेन रोलय् एक्टिंग याइपिं कलाकारपिंत जक बीमाः ।

सुरेन्द्र मानन्धर
सुपरस्टार धइपिं थौं म्हिगः तिनि थ्व ख्यलय् वःपिंत मखु थन थःगु जीवन पानाच्वंपिंत धायेमाः । जिं स्वयेबले झीसं झीत लँ क्यँपिं अग्रजपिं मदनकृष्ण श्रेष्ठ, भृगुराम श्रेष्ठ थेंज्याःपिनिगु योगदानयात नं लुमंकाः वय्कःपिंत निं सुपरस्टार धकाः धायेमाः थें च्वं ।

पूर्णकाजी ज्यापु
नेवाः संकिपा ख्यलय् नं थुलि तःजिगु सिरपा तयेत्यंगुलिं ग्वसाः खलःयात सुभाय् मबिसें मगाः । बरु जिं स्वयेबलय् थ्व सिरपाया नां अंगे्रजी खँग्वः धाःसा पाय्छि मताल । उकिं जिं स्वयेबलय् थ्व सिरपाःयात “नेवाः थीगु नगु” धका तःसा पाय्छी जुइथें च्वं ।

रजनी खड्गी
थ्व सुपरस्टार सिरपायात कम्पिटिशन कथं मयासे कलाकारया ज्यायात मूल्यांकन यानाः बीगु हे बांलाइ । थुकि छु नं कथंया भोटिंग वा नोमिनेशन पिकाना च्वनेगु बांलाइ मखुथें च्वं ।

सुरेन्द्र तुलाधर
थन पिहांवःगु खँ न्यने धुंकाः ग्वसाः खलःया नुगः स्वकु थहां वःगु दु । सकसिनं बांलाःगु खँ तयादिल । नेवाः सुपरस्टार सिरपाः धइगु जापानय् च्वनाः नं थःगु देय् नेपाः व नेपाःया शिक्षा व संस्कृति ख्यलय् नुगः क्वसायेका वयाच्वंम्ह सुनिलकुमार शाक्यया कुतलं म्होतिं नं स्वीगू लखतकाया अक्षय कोष दयेकाः नीस्वनेगु ताःतयाः घोषणा जूगु खः । थन नेवाः सुपरस्टार सिरपाःयात दिपाः मदिक्क न्ह्याका यंकेफयेमा धइगु हे सकसिंया मति दुगु खनेदत । थ्व सिरपाःयात कयाः थन न्ह्यब्वःगु सकसिया बिचाः छक्वः दुवाला स्वयेगु नं जुइ । अले सिरपाया नां नेवाः भासंं तयेगु धइगु खँ नं पाय्छि हे ताल । थुखेपाखे नं बिचाः यायेगु जुइ । जिं स्वयेबलय् थ्व सिरपाः वा सम्मान धइगु पुलांपिंत मखसे न्हूगु पुस्ताया सकृय प्रतिभापिंत बीमाः थें च्वं । थुकिं न्हू पुस्ता प्रोत्साहित जुइगु व सम्मानित जुइथें जित ताः ।

दकलय् लिपा
नेपाःया फिल्मख्यलय् थुकथं तःजिगु सोच आःतक खँय् भाय्या फिल्म ख्यलय् तक नं खनेमदुनि । छगू छगू लख तकाया सिरपाः दँय् निम्हेसित बी धइगु खँ च्वछायेबहगु खँ खः । तर विदेशी खँग्वः सुपरस्टार त्यायेकाःगु पाय्छि मखु । उलि जक मखसे सुपरस्टार धइगु खँग्वलं छम्ह कलाकारयात अहंकारी दयेकाबीगु नं सम्भावना दु । बलिउडया न्हापांम्ह सुपरस्टार धकाः बय्बय् जूम्ह राजेश खन्नायात सुपरस्टार धकाः मधातले वं फिल्मय् बांलाक ज्या नं यात । फिल्म नं बांलात । तर सुपरस्टार धायेधुंकाः राजेश खन्ना दुने थुलि अहंकार ब्वलन कि वं लिपा वनाः छु ठीक छु बेठीक धइगु तकं दुवाले मफया वन । उकिया लिच्वः कथं राजेश खन्नाया पतन हे जुल धइगु खँ थनथाय् लुमंकेबहजू ।